19.11-24.11.2012ж. аралығында мектебімізде мемлекеттік тілде оқытылатын бастауыш сыныптарда « Шығармашылыққа баулу- оқу-тәрбие процесінің тиімді көрсеткіші» тақырыбында әдістемелік пән апталығы өтті.

 Апталықтың мақсаты: Сабақта және сабақтан тыс жұмыстарда оқушылар мен мұғалімдердің бірлескен танымдық іс-әрекетін ұйымдастыру. Сабақ тиімділігі мен білім сапасын көтеруге бағытталған мұғалімдердің ізденістік әдістемелік жұмыстарын жүйелеп дамытуға орта құру.

Міндеттері:

-         Сабақ барысында оқушы білімін сапалық көрсеткішке- нәтижеге бағыттау;

-         Білімді үйренуде ақпараттық технологияны кеңінен қолдану;

-         Оқушының шығармашылық өсуіне, қабілеттерін ашуға жағдай туғызу, қолдау жасау;

Күтілетін нәтиже:

-         Оқытудың жаңа әдістерін меңгеру, ұйымдастыру жолдары жүзеге асырылады.

-         Мұғалімдер сабақ тиімділігін арттыруға бағытталған әдістемелік жұмыстарын жүйелеп, ізденеді.

-         Оқытудың жаңа әдістері, ұйымдастыру жолдары жүзеге асырылады.

-         Оқушылардың шығармашылық қабілеттері дамып, білімділік негіздері жетіле түседі, мұғалімдер тәжірибе алмасу ортасын құрады.

Апталық төмендегідей жоспар бойынша өтті.

Апталық барысында әр-түрлі пәндерден ашық сабақтар, тәрбие сағаттары, сайыстар өткізілді.

    1 «Ә» сынып мұғалімі Жетпісбаева Р.И. дүниетану пәнінен «Өсімдік мүшелері» тақырыбында ашық сабақ көрсетті. Сабақта оқушыларға интерактивті тақта арқылы танымдық мәліметтер берді.Дидактикалық ойындар ойнай отырып,оқушылар жаңа сабақтан алған білімдерін бекіте түсті. 2 «Б» сыныбында математика пәнінен Қарағанды қаласына саяхат түріндегі ашық сабақ өтті.Сынып мұғалімі Асылбекова Ж.А. сабағында оқушыларды шығармашылыққа жетелейтін жұмыс түрлерін тиімді қолдана білді.Сынып оқушылары сабаққа белсене қатысып отырды.

       4 «А» сынып мұғалімі Ибраева К.К. қазақ тілі пәнінен  сабақ тиімділігі мен білім сапасын көтеруге бағытталған жұмыстарын жүйелі түрде сабақ барысында қолдана білді.Оқытудың топтық формасын қолдана отырып, оқушылардың шығармашылық қабілеттерінің артуына жағдай туғызды. Жаңа сабақта оқушылар топ бойынша тірек кестелермен жұмыс жасады,қыстырма сөйлемді қолдана білуге біршама үйренді.Оқушылардың пән бойынша біліктері қалыптасқандығы көрінді.

      2 «Ә» сынып мұғалімі Қойбағарова К.К. өзін-өзі тану пәнінен «Кешірімді бала- кішіпейіл бала» тақырыбында ашық сабақ өткізді. Интерактивті тақтадан слайдтар көрсету арқылы оқушыларды  кешірімді, кішіпейіл болуға үйретті.Оқушылар жағдаяттарды шешуге байланысты шағын көріністер көрсетті, өзіндік ой-пікірлерін айтып ой бөлісті.Бір-бірлеріне жүрек жылуларын беру арқылы, кішіпейіл болуды үйренді.

      3 «А» сыныбында өткен «Тәуелсіздік символы-ұлттық теңге» атты ақпараттандырылған тәрбие сағатының оқушыларға берері көп болды.Сынып жетекшісі Кошикова М.Б.оқушыларға ұлттық валютамыздың өткені және қазіргі жағдайы жөнінде тарихи-танымдық ақпараттар берді.Оқушылармен шығармашылық жұмыстар жасай отырып,төл теңгеміздің тұрақты да, маңызды валюта екендігін атап көрсетті.Сонымен қатар оқушылар түрлі елдердің ақша үлгілерін жинақтап, өздерінің нумизматика саласында да ізденуші екендіктерін байқатты.

      3 «Ә сыныбында Қуантаева Г.К. « Ас- адамның арқауы» тақырыбында тәрбие сағатын өткізді.Бұл сабақта оқушылар дұрыс тамақтанудың негізгі қағидаларымен танысып, салауатты өмір салтын ұстануға, ас ішудегі әдептілік ережелерін және дастарқанды сыйлаудың, ұлттық дәстүрімізді сақтай білу туралы көптеген мағлұматтар алды.

     Биыл біздің елімізде алғаш рет 1 желтоқсан – Тұңғыш Президент күні болып тойланады. Осы күнді мерекелеуге орай апталықта оқушылардың шығармашылық жұмыстары жоспарланды. Атап айтқанда, 2 сынып оқушылары президентіміздің өмірі мен қайраткерлігі жөнінде коллаждар, бүктеме альбомдар жасаса,3 және 4 сынып оқушылары «Менің президентім» тақырыбында шығармалар жазды. Ең үздік шығармаларды жазған оқушыларды атап айтсақ, 3 «А» сыныбынан: Рыскалиева Алия,Сұлтанбекова Алуа, Какенова Арайлым, Тынысбек Ақерке, Исагулов Данияр, 3 «Ә» сыныбынан Хаметова Дильназ, Мәжит Айқаным, Ысқақнәби Ақыт, Тәукебаева Ажар, Ерболова Айгерім, 4 «А» сыныбынан Жеңіс Арайлым, Болат Ақнұр, Жеңісқызы Медина, Жанысбай Асылхан, 4 «Ә сыныбынан Мәжит Мұстафа, Ұзақбаев Ислам, Ғайни Әлихан. Оқушылар өз шығармаларында президентке деген балалық  сезімдерін шын жүректен жаза білген.

     Жалпы, бастауыш сыныптар тән апталығында жоспарланған іс-шаралар өз деңгейінде өтті. Апталық барысында мұғалімдер өз істеріне жауапкершілікпен қарап, шығармашылықпен іздене білді.Апталықта көзделген мақсат, міндеттер орындалды.