4-10.10.2019ж. 9 «Ә», 9 «Б» сыныптар аралығында «Қыздар сұлулығы» атты эссе байқауы өтті. Байқаудың мақсаты сұлулықтың не екені, қыздардың сұлулығы жайында оқушылар өз ойын ашық, анық жеткізуі.

   Оқушылар өз ойларын еркін жеткізе берді. Жазылған эсселеді іріктеп, ішінен жақсы жазылғандарына орын берілді. Үздік эссе болып  9 «Ә» сынып оқушысы Мұрат Ақнұрдың  шығармасы таңдалып алынды.

Мұрат Ақнұр

№66 мектеп-лицей

9 ә сынып оқушысы

Қыздар сұлулығы

   Сұлулық дегеніміз - адамның сыртқы бейнесінің де, ішкі әлемінің де көркемдігі. Менің ойымша, адамды тек сырт келбетіне қарап сұлу деп айту мүмкін емес. Себебі оның жан-дүниесі сұлу болмайынша, сырт келбетін сұлу деп айта алмаймыз. Адамның сұлулығы сырт келбетінің және жанының көркемдігімен үйлесуі тиіс. Ал мұндай үйлесімділік болмайынша, ол сұлулыққа қол жеткізе алмайды.

    Сұлулыққа әркімнің де бар таласы демекші, барлық қыздар сұлу, көркем болғысы келеді. Алайда осы жолда олар сырттың сұлулығы ғана маңызды деп ойлап, соған басымдылық беріп жатады. Бәрі өзіне күтім жасап, шашын бояп, бетіне опа-далап жағып, әдемі киінуге тырысады. Бірақ олардың бәрі сұлу емес. Ішінің сұлулығына мән беретіндері тіптен аз дер едім. Бүгінде қыздардың да былапыт сөздер айтып, темекі шегуі, ішімдікке әуес болуы үйреншікті болып барады. Ал бұлар қазақ қызына, жалпы қыз табиғатына жан нәрселер. Ол қыздың сыртқы сұлулығын құртады. Меніңше, көп ізденетін, алдына асқақ арман қоятын, соған жетуіге ұмтылатын, білімге құштар адамдар – нағыз сұлу жандар. Олардың жүзінің өзі ерекше сұлу, көркем болып тұрады. Адамды өзіне еріксіз тартады. Ал айтқан әңгімесін естігенде, қасында тапжылмай отыра бергің келеді. Міне, осындай адамдарды сырт келбеті мен жан-дүниесінің көркемдігі, әдемілігі келіскен, үйлескен нағыз сұлу жандар деп айтуға болады. Сондай-ақ, сұлу адамдардың адамгершілігі жоғары, талғамы, арманы асқақ, ұстанымы биік болуы тиіс. Олар өзгелерге үлгі болуы керек. Тек жақсы жағынан үлгі беруі керек.

Адамның бәрі өмірге әдемі болып келеді және оның түрінің қандай болатыны өзіне байланысты емес. Алайда адам өзінің жан-дүниесін өзі жасап, қалыптастыра алады. Сондықтан мен сырты әдемі адамдарды сұлу деп айта алмас едім.

Бірде үлкен ғұлама өте сұлу қызды көріп, оған қарапайым сұрақ қойған екен. Алайда сұлу оның сұрағына жауап бере алмапты. Сонда ғұлама: «Сен алтын тостағанға құйып қойған ашыған сусынмен бірдей екенсің», - депті. Яғни ол бойжеткеннің жан-дүниесінен еш сұлулық көре алмаған. Сондықтан да сұлуды ашып кеткен сусынға теңеп отыр.

Өз басым сырт келбетіме мән беремін. Үнемі таза жүруге тырысамын. Алайда мен үшін жанымның сұлулығы маңызды. Сол үшін көп ізденемін, кітап оқимын. Және өзімнің адамдығым, адамгершілігім жоғары болғанын қалаймын. Осы мақсатта игі істер жасауға ұмтылып, жамандықтың ала жібін аттамауға тырысамын. Сонда ғана өзімнің нағыз сұлу бола алатыныма сенемін.