Сарыарқа жерінде, №6 жалпы білім беретін мектепте қазақтан шыққан тұңғыш ғарышкер – Тоқтар Оңғарбайұлы!

2022 жылдың 14 сәуір күні Қарағанды қаласындағы «№6 жалпы білім беретін мектепте 12 сәуір - Дүниежүзілік ғарышкерлер күніне арналған облыстық «Өнегелі өмір» жобасы аясында «Қазақты әлемге танытқан тұлға» тақырыбында қазақтан шыққан тұңғыш ғарышкер Әубәкіров Тоқтар Оңғарбайұлымен кездесу өтті.

Батыр ағамызбен кездесуге Қарағанды облысы әкімінің орынбасары Аликулов Ербол Шымкентбаевич арнайы қатысты. Сонымен бірге кездесуге Қарағанды облысының білім басқармасының басшысы Қожахметова Гүлсім Шабдановна және қалалық білім бөлімінің мамандары келді. Қазақстандағы ынтымақтастық өкілдігінің басшысы (шетелде тұратын отандастардың Тәуелсіз Мемлекеттер Достастығы істері және халықаралық гуманитарлық ынтымақтастық жөніндегі федералдық агенттігі) Коропченко Алексей Анатольевич кездесудің арнайы қонағы болды. Кезінде ғарышкер Тоқтар Оңғарбайұлымен бірге жұмыс істеген замандастары, үзеңгілес достары кездесуге арнайы келіп қатысты. Қазақтан шыққан тұңғыш ғарышкер Тоқтар Оңғарбайұлы мектеп ішінде орналасқан «Авиация және ғарышкерлер» музейіндегі құнды жәдігерлермен ғарыш тарихымен, естеліктермен танысты. Сонымен бірге мектептегі IT кабинеттегі оқушылардың ғылыми-зерттеу жоба жұмыстарын көріп, өзінің оң бағасын берді.

Бұдан кейін мектептің мәжіліс залында Қазақстан Республикасының халық қаһарманы Тоқтар Оңғарбайұлының құрметіне арналған мерекелік бағдарламамен ұласты. Мерекелік концертте мектебіміздің өнерлі оқушылары өз өнерлерін көрсетіп, мектептің оқушылары қойған сұрақтарына ғарышкер Тоқтар Оңғарбайұлы тұщымды да салмақты оймен жауап берді.

Кездесу соңында батыр ағамыз, қазақтың біртуар тұңғыш ғарышкері Тоқтар Оңғарбайұлы кездесуді ұйымдастырған ұйымдастырушыларға, мектеп ұжымына, «Авиация және ғарышкерлер» музейінің жетекшісі Мағрифа Аманбековнаға өз ризашылығын білдірді. Бізде Аңыз адам, қазақтың тұңғыш ғарышкері Әубәкіров Тоқтар Оңғарбайұлына мектебімізге келіп, оқушыларымызға, ата-аналарға ерекше көңіл-күй сыйлап, өз ақыл-кеңесімен бөліскені үшін алғыс білдіреміз! Өскелең ұрпақ тәрбиелеудегі өрелі жұмыстар және мемлекеттің гүлденуі жолындағы абыройлы істеріңізге толымды табыстар тілейміз! Адамзат алдындағы өлшеусіз еңбегіңіздің жемісін көріңіз демекпіз!