Бірнеше жыл мәпелеп, күтіп тәрбиелеген бүлдіршіндерімізді ұямыздан ұшырып, мектепке шығарып салдық. Әрине, бұл - үлкен той, үлкен мереке. Біздің «Балбөбек» бөбекжайында бірнеше күн қатарынан «Балабақшамен қоштасу» ертеңгіліктері жүргізілді. Ертеңгілікте балалар өз өнерлерін көрсетіп қана қоймай, ойыншықтарын балабақша бүлдіршіндеріне табыстап, балабақша өмірімен қоштасты. Ертеңгілікте балалармен қатар ата-аналар да «Әкелер биі» мен «Аналар биін» көпшілікке паш етті. Кеше ғана кішкентай бүлдіршіндер балабақшаға тәй-тәй басып, былдырлап келіп еді. Енді міне, қолдарына шар ұстап, оны аспанға ұшырып, тілек тілеп балабақшамен қоштасты. Баулып, баптап өсірген. Бұзықтық етсек кешірген Ұмытпаймыз өзіңді. Ұмытпаймыз сөзіңді,-деп балалар балабақшамен, тәрбиешілерімен қимай қоштасты. Біз де түлектерге ақ жол тілейміз!