Жас натуралистер станциясының үйірмелерінің қосымша білім беру педагогтері оқушыларымен бірлесіп, «Гүл өскіндерін көшеттеу» тақырыбында практикалық сабақтар өткізді.

    Көшеттеу (пикировка) сөзі француздың «пике» – "үшкір қазық" сөзінен шыққан, яғни, топыраққа егілген өскінде 1-2 жапырақ пайда болғаннан кейін оны басқа жерге осы үшкір заттың көмегімен түбін қопсытып алып, басқа жерге отырғызу дегенді білдіреді. Көшеттеу төмендегідей жүргізіледі:

• Бір күн бұрын көшеттер мол сумен суарылады.
• Әр көшет арнайы шпательмен, қарындашпен немесе жұқа жалпақ таяқшамен түбі қопсытылып,  ажыратып алынады, содан кейін отырғызады.
• Өскіннің түбінен емес, жапырақтарынан ақырын ұстау керек.
• Топырақтан тазартып, көшет тамырының үштен екісін немесе тіпті, жартысын ғана қалдырып, ұшын қиып тастау керек. Бұл тамырлардың ұзынына емес, еніне қарай өсуі үшін қажет.
• Топырақты ептеп ойып, көшет жаңа өсіп шыққан жапырақтарының түбін топырақ жабатындай күйде отырғызылады.
• Тамырлардың төмен қарай бағытталғанын тексеріп, топыраққа батыра орналастырады.
•  Осыдан кейін көшеттер тұнған жылы сумен суарылып, 2-4 күндей жарық жерге қойылады.

    Гүл өскіндерін көшеттеу тақырыбында жүргізілген практикалық сабақтардың нәтижесінде оқушылар өскіндерді егу бойынша білім мен дағдыларын дамытады, көшеттерді өз бетінше өсіруді үйренеді.  Қазіргі уақытта 1000 данадан астам өскін көшеттеліп, егілді.