Жас натуралистер станциясында көктемгі дайындық жұмыстары басталып кетті. Қосымша білім беретін педагогтер станцияның  агробиологиялық учаскесі мен станцияға бекітілген мектептер үшін көктемгі егіске гүл дақылдарын отырғызып, өндірістік жұмыстарды жүзеге асыруда.

  "Қоршаған ортаны қорғау", "Жас бағбан", "Жас эколог", "Флористика және фитодизайн", "Бөлме өсімдіктері әлеміне саяхат", "Эколог-зерттеуші", "Дизайнер-гүл өсіруші", "Интерьер және ландшафтық дизайн", "Экологиялық шеберхана", "Табиғат және қиял" атты станция үйірмелерінің оқушылары жетекшілермен бірлесіп, мектеп аумағын, агробиологиялық учаскені абаттандыру үшін мектеп жанындағы учаскені көгалдандыру және жер телімін ұтымды пайдалану жұмыстары бойынша  дизайн-жобаларды алдын ала әзірледі. Осы жұмыстарды жасап, гүл көшеттерін өсіру үшін қораптар, кассеталар, құнарлы қара топырақ  дайындалды.

   Көктемгі өсімдік отырғызу – суыққа төзімді емес сорттарды өсіру үшін қолайлы кезең. Сондай-ақ, станция жылыжайында гүл дақылдарының біржылдық және көпжылдық сорттары – петунья, агератум, рудбекия, виола, барқытгүл, цинная, астра, хризантема – егіледі.

  Осылайша, станция көшеттер отырғызу арқылы жоғары сапалы дақыл өсірудің жақсы тәсілін  қолданып отыр. Ең бастысы - өскін отырғызуды алдын-ала бастау, қоршаған ортаға қамқорлық жасау, уақтылы суару және өсімдіктерге күтім жасау. Көктем - станция педагогтері үшін маусымдық өндірістік жұмыстардың қызатын шағы.