Қарағанды экомұражайы қаланың индустриалдық даму тарихын, еліміздің экологиялық жағдайы жайлы  ғылыми экспонаттар жинақталған мәдени ошақтардың біріне айналған. Сондықтан «Жас натуралистер станциясы» Экомұражай басшылығымен тығыз ынтымақтастықта жұмыс жасап,  білім беру және мәдени бағдарламалар аясында экскурсиялар өткізіп тұрады.

    2021 жылдың 7 желтоқсанында Экомұражайға №8 ЖОББМ-нің оқушылары, Жас натуралистер станциясының «Химия және қоршаған орта» үйірмесінің тәрбиеленушілері саяхаттап барды. Экскурсия үйірменің теориялық сабақтарында алған білімдерін бекіту шеңберінде өтті.

     Жас жеткіншектер қаламыздың өнеркәсіп аймағы ретінде дамуы,   Қазақстандағы алғашқы экологиялық зерттеулер, өнеркәсіптік ғимараттарды салу және қайта құру, жол салу, зауыттарды, кәсіпорындарды, облыстағы инфрақұрылымды жаңғыртуға байланысты жасалған  жобалар жайлы білімдерін толықтырды.

   Сонымен қатар, мұражайды тамашалауға барған оқушыларға Байқоңыр ғарыш айлағынан бүгінге дейін  жөнелтілген ғарыш кемелерінің макеттері, айлақтың құрылу тарихы мен еліміздің ғарышкерлерінің өміртарихы баяндалған экспонаттар көрсетілді.

    Тарихтың қайғылы сәттері де назардан тыс қалған жоқ. Экскурсанттар Семей полигонының туған жер табиғатына тигізген кері әсері, оның бүгінге дейін созылған зардаптары жайлы материалдар мен экспонаттармен танысып, ядролық қаруды әскери мақсатта пайдаланудың қаншалықты қауіпті екеніне көз жеткізді.

      Балалар экскурсия жетекшісін қызығушылықпен тыңдап, сұрақтар қойды.

    Экскурсияға қатысушылар іс-шара соңында көптеген жаңа мәліметтерді біліп қана қоймай, туған табиғатқа қамқорлықпен қарап, оны қорғаудың қаншалықты маңызды екенін түсініп, бұл туралы өз ойларын айтып, өзара әңгімелесіп, тұжырым жасады.