Өткен аптада жаратылыстану айлығына байланысты химия пәні бойынша 10 сынып оқушылары арасында "Эрудит" атты химиялық білім сайысы өткізілді. Жарыс ойынының мақсаты оқушылардың танымдық ой-өрісін дамыту, химияның практикалық маңыздылығын және адам өміріндегі заңдылықтарын білу болып табылды.

    Әр топ оқушылары өздерін "Химия әлеміне саяхат" ұранымен және презентациясымен таныстырды. "Ой қозғау", "Ғылым тоғысында" кезеңдерінде оқушылар үшін жаратылыстану пәндерімен байланысты қызықты логикалық сұрақтар, химиялық формулалар мен реакция теңдеулерін құрастыру тапсырмалары орындалды. Топ жетекшілер сайысында оқушылар химиядан ұшқыр, сондай-ақ, қызықты деректерге ие болды.

    Сонымен қатар, 10 сынып оқушылары "Химияның ғажайыптары" атты практикалық кезеңінде химиялық буфет зертханашысы ретінде өзін сынап көрді. Онда түрлі реактивтерден химиялық шырындар, коктейльдер және сүт дайындалды. Химиялық айналуларды бақылау барысында оқушылардың пәнге  деген танымдық қызығушылықтары артқандығы байқалды.

    Кеш соңында "Досыңды тап" атты музыкалық бөлім өткізілді, оның мақсаты катиондар мен аниондардан жұптар құрастыру болды. Одан кейін барлық қатысушылар өз жұптарымен "Кішкентай үйректердің биін" биледі. Сайыстың маңыздылығы химия пәні  бойынша оқушылардың білімі мен дағдыларын жүйелендіруге, пәнді оқуға деген оң уәжін қалыптастыруға және шығармашылық қабілеттерін дамытуға бағытталған.