2024 жылдың 21-25 қазан аралығында Қазақстан Ұлттық Федерациясының ЮНЕСКО Клубтары мен Қарағанды облысының өңірлік өкілдігі ұйымдастырған “Тұрақты даму үшін серіктестік” атты халықаралық ғылыми-практикалық конференциясы өтті. Іс-шараға Өзбекстан Республикасының білім беру ұйымдарының делегациясы, Қарағанды облысы білім басқармасының, Қарағанды қаласы білім бөлімінің және облыстың басқа да құрылымдарының өкілдері, «Аманат» партиясының Қарағанды қалалық филиалының мүшелері, сондай-ақ Қарағанды облысындағы клубтық қозғалыстың мүшелері қатысты.
Конференция аясында 24 қазан күні Қарағанды қаласының Оқушылар сарайы Өзбекстаннан келген делегацияны қабылдады. Бұл кездесу қосымша білім беру мен балалар шығармашылығы саласындағы халықаралық ынтымақтастық пен тәжірибе алмасу мақсатында өтті. Делегация құрамында Қазақстан Республикасы Білім және ғылым министрлігі мен Білім басқармасының, сондай-ақ басқа да білім беру ұйымдарының өкілдері болды.
Сапар барысында қонақтарға Оқушылар сарайының оқу процесі және тәрбие жұмыстары таныстырылды. Сонымен қатар, ЮНЕСКО клубы аясында жүзеге асырылып жатқан “Алтын бесік” бағдарламасының бағыттары бойынша бірнеше шеберлік сабақтары көрсетілді. Бағдарламаның басты мақсаты – жас ұрпаққа рухани-адамгершілік құндылықтарды сіңіру және ұлттық құндылықтарды тәрбиелеу. Қонақтар шеберлік сабақтарға белсене қатысып, ерекше қызығушылық танытты.
Сапардың ерекше бөлігі – “Шаңырақ” этнографиялық сабағы болды, онда қонақтарға киіз үйді қалай құру керектігі көрсетілді. Өзбекстандық қонақтар бұл үдеріс барысында киіз үйді өз қолдарымен құрып, қазақ халқының дәстүріне деген қызығушылықтарын көрсетті. Сабақ соңында олар ұлттық дәм – бауырсақпен шәй ішіп, жылы әңгіме өрбітті.
Бұл кездесу Қазақстан мен Өзбекстан арасындағы білім беру саласындағы ынтымақтастықты нығайтып, халықаралық серіктестікті одан әрі дамытуға ықпал етеді.
Авторство:
