№15 жалпы білім беретін орта мектебі өскелең ұрпаққа сапалы білім, саналы тәрбие беріп келе жатқан іргелі білім шаңырақтарының бірі. Жас жеткіншектердің жан-жақты тұлға болып қалыптасуына баса назар аударатын мектеп ұжымы оқушылардың ұлттық құндылықтармен қарулануына да күш салы келеді. «Қош келдің, Әз Наурыз!» атты мерекелік іс-шараны ұйымдастыру да осы сұраныс үдесінен туындаған келелі қадамдардың бірі.

«Қош келдің, Әз Наурыз!» атты мерекелік іс-шараға қаламызға танымал қоғам қайраткерлері, өнер адамдары, зиялы қауым, сонымен қатар «Қарағанды облысының білім басқармасы», «Қарағанды қаласының білім бөлімі» басшылары мен мамандары, қаламыздағы білім ошақтарының басшылары шақырылды. Сонымен қатар, ауданның, қаланың тұрғындары да көрермен ретінде шақырылған болатын.

Мектеп ұжымы мен оқушыларының күшімен әзірленген шара әдеби-сазды қойылыммен басталды. Мектеп ұстаздары келген қонақтарды шашу шашып қарсы алып, оларды «Наурыз көже» дәмімен төрге оздырды. Төрге озған қонақтар мектеп оқушылары мен ұстаздары әзірлеген мерекелік шара «Наурыз мейрамына» арналған көрініспен басталды. Сахнаға ақ түйеге мініп, Қыдыр ата келді. Ол көпшілікке бата беріп, киіз үйге беттеді. Бұдан кейін «Жер-АНА» аластау рәсімін жүргізіп, бәле-жаладан аулақ болуға шақырды.

Бұдан кейін мектеп оқушыларынан құрылған би тобы мың бұрала би билеп, көпшілікті өздерінің өнерімен тамсандырды. Мектеп оқушыларынан құрылған домбыра ансамблі де күмбірлеген күйден шашу шашып, көпшіліктің мерекелік көңіл-күйін одан әрі шалқыта түсті.

Мектеп алдына тігілген ақшаңқан киіз үйде салт-дәстүр мен әдет-ғұрыптың түр-түрі көрсетіліп жатты. Бала өмірге келгеннен бастап, «жер-бесікке» аттанғанғанға дейінге рәсімдердің барлығы өзінің мазмұндылығымен, айшықтылығымен ерекшеленіп жатты.

Киіз үй жанында жәрмеңке өткізіліп, Оңтүстік-Шығыс ықшамауданының тұрғындарына мектеп мұғалімдері мен қызметкерлері өздерінің ыстық ықыластарын көрсетіп жатты. Наурыз мейрамына орайластырылып өткізілген «Ұтыс лотереясы» да тұрғындардың қызығушылығын тудырып, олардың мерекелік белсенділігін арттыра түскендей.

Тағы бір кеңістікте ұлттық ойын түрлерінің «көрігі» қызып жатты. «Асық ату», «Жамбы ату», «Арқан тарту», «Қазақша күрес», «Еркін күрес» т.б. ойын түрлеріне тек мектеп оқушылары ғана емес, аудан, қала

тұрғындары қатысып, өз бақтарын сынап жатты. Сайыс жеңімпаздарына естелік сыйлықтар табысталды.

Киіз үй маңына алтыбақан тігіліп, ән әуелеп жатты. Мерекелік шараған тек мектеп ұжымы ғана емес, аудан қала тұрғындары белсене атсалысты. Олар іс-шараны тамашалап, Наурыз көжедене дәм татып, өздерінің өнерлерін ортаға салып жатты. Ұлттық құндылығымызды дәріптеген ұлық шарадан қонақтан көтеріңкі көңіл-күймен тарқасты.