Барысы:
Сахнада Құрманғазының «Сарыарқа» күйі ойналып тұрады. Күй аяқталады. Сахнаның екі жағынан музыканың сүйемелдеуімен кернейшілер шығады.
Мұғалім:
Уа, халайық, халайық!
Мұнда назар салайық.
Мерекесі халықтың
Наурыз тойын бастайық.
Құтты болсын мереке,
Болсын думан береке.
Наурыз мерекесі – Ұлыстың Ұлы күні деп аталады. Наурыз – өте көнеден келе жатқан мейрам. Наурыз сөзі парсы тілінде «Нау» - жаңа, «рыз» - күн деген сөздерден шыққан, жылдың бірінші күнін білдірген. Наурыз – жаңа жыл тойы, көктем мерекесі, күн мен түннің теңесу сәті, халықтардың ынтымақ күні. Бұл күні күн мен түн теңеліп, күн ұзарып, түн қысқарады.
Ән:Қазақы дастарханым
Мұғалім:
Қызыр ата ортамызға келіп тұр,
Бізге ақ батасын, ақ тілегін берейін деп.
Сәлем беріп, алақанымызды жайып,
Алайық атамыздың ақ батасын.
Қызыр баба кіреді.
Сұрасаң бата берейін,
Үстем болсын мерейің.
Ықыласпен қол жайсаң,
Ақ тілекті төгейін.
Ұлыс оң болсын,
Ақ мол болсын,
Қайда барсаң жол болсын!
Ұлы халқым тоқ болсын,
Көйлектерің көк болсын!
Қайғы уайым жоқ болсын,
Қуаныштарың көп болсын!
Аумин!
Мұғалім:
Енді ортаны баршамызға ашайық,
Көрерменге жырдан шашу шашайық.
Ән мен күйді, жыр мен биді шалқытып,
Өнерлермен інжу-маржан шашайық.
Қызыр ата бүгінгі мерекенің құрметті қонағы болып, біздің өнерімізді тамашалаңыз.
Би: Қыздар тобы
Мұғалім:
- Қане, арамызда жыл санауды кім біледі екен?
- Тышқан,сиыр, барыс, қоян, ұлу, жылан, жылқы, қой, мешін, тауық, ит, доңыз.
- Биылғы жыл қалай аталады?
- Ұлу
- Олай болса, Ұлу жылын қарсы алайық.
Ұлу.
Құтты болсын жаңа жасың, қазағым,
Қызыл – жасыл тарқамасын базарың!
Биылғы жыл – берекелі Ұлу жылы,
Арта берсін, елдің көркі, жер нұры!
Ән: Айгөлек
Мұғалім:
Наурыз тойын әдемі,
Әжем еске түсірді.
Біздерге арнап әдейі,
Наурыз көже пісірді.
Ортаға әже шығады. Қолында «Наурыз көже».
Әже:
Наурыз дәмі –
Наурыз көже беретін,
Үй қыдырып жүретін,
Әдет – ғұрып, салтым бар.
Қане, қазан ашылсын,
Жеріме ырыс шашылсын.
Жеті дәмнен тұратын,
Наурыз көже ішілсін.
«Биссимиллә» - деп бастаймын,
Әдептен әрі аспаймын,
Ырыс толсын шарама,
Көже құя бастаймын.
Залда отырған үлкен адамдарға «көже» құйып шығады.
Ән: Бақытыңды аяла
1 – оқушы:
Қош келдің, Наурызым ардақты,
Халқым саған бар үмітті арнапты.
Жылда осындай келе бергін жасарып,
Гүлге бөлеп, нұрға бөлеп аймақты.
2 – оқушы:
Наурыз келді, жайраң қақты таң күліп,
Жап – жасыл боп кетті дүние жаңғырып.
Жақсылыққа жаршы болған Наурызым,
Сен өмірдің көктемісің мәңгілік!
3 – оқушы:
Наурыз келсе құт келгені, халайық!
Есік ашып, шашу шашып,
Ел болып қарсы алайық!
Қош келдің, Наурыз!
4 – оқушы:
Наурыз тойы – береке,
Наурыз тойы – жыр аңыз.
Қызып дулы мереке,
Қызық думан құрамыз.
Ән: Қыз сыны
Мұғалім:
- «Наурыз» мерекесінде қандай тілектер айтылады?
- «Наурыз көжеге» неше түрлі тағам түрі қосылады? Атап шығыңыз?
- Наурыз мерекесінде айтылатын қандай тілектер білесіңдер?
- Киіз үйдің негізгі бөлшектерін атап шығыңдар?
- Қазақ халқының ұлттық аспаптарын атап шығыңдар?
- Қазақстанда тойланатын ұлттық мерекелерді атаңдар?
Наурыз келді, жайраң қақты таң күліп,
Жап – жасыл боп кетті дүние жаңғырып.
Жақсылыққа жаршы болған Наурызым,
Сен өмірдің көктемісің мәңгілік!
Би:Қара жорға.
Мұғалім:
Наурыз құтты болсын!
Дендеріміз сау, мықты болсын!
Наурыз тойы келе берсін!
Барлық халық бақытты болсын,
Еліміздің несібесі көп болсын.
Қош, сау болыңыздар, халайық!
Көріскенше күн жарық болсын!!!
Contacts
