Қазақстан Республикасының Мемлекеттік Туы ортасында шұғылалы күн, оның айналасында қалықтап ұшқан қыран бейнеленген тік бұрышты көгілдір түсті мата. Матаның сол жағында ұлттық өрнегі бар тік жолақ орналасқан. Күн, шұғыла, өрнек және қыран бейнесі – алтын түсті. Тудың ені ұзындығының жартысына тең.Қазақстан Туындағы күн бейнесі – ежелден белгілі ғарыштық нышан, тіршіліктің негізін, жарық сәулесін білдіреді.Тәңіршілікті ұстанған ежелгі түріктер көк аспанға, күнге, ауаға, жерге табынған. Сондықтан тудың көк түсі халықтардың өзара тарихи сабақтастығын аңғартады.Қыран бүркіт –биліктің белгісі, Қазақстан Республикасының еркіндік сүйгіш асқақ рухын, қазақ халқының жан дүниесінің кеңдігін паш етеді. Алтын бүркіттің бейнесі Қазақстан Республикасының әлемдік өркениеттің шыңына жету құштарлығын білдіреді.Мемлекеттік Тудың авторы –Шәкен Оңласынұлы Ниязбеков
