Инклюзивті білім беру – Қазақстан Республикасы білім беру саласының басым міндеті.

Қарағанды қаласы білім бөлімінің іс-әрекеті Қазақстан Республикасының 2011-2020 жылдарға арналған білім беруді дамытудың мемлекеттік бағдарламасын орындауға бағытталған. Бағдарламаның индикаторларының бірі –  даму мүмкіндігі шектелген балаларға арнап қолжетімді орта жасау болып табылады. Осы бағытта мектепке дейінгі мекемелер мен орта білім беру мектептерінде инклюзивті білім беруді насихаттау, жүзеге асыру бойынша жоспарлы шаралар атқарылуда. Бүгінгі таңда арнайы білім беру қажеттілігі бар балаларды мектепке дейінгі мекемелерде, орта мектептерде жалпы білім беру сыныптары мен топтарында қамтып, оқыту және тәрбиелеу үшін жағдай жасалуда. Қарағанды қаласының білім ұйымдарында инклюзивті білім беруді дамытудың 2016-2019 жылдарға арналған Жол картасы жасалып, бекітілген. Осы Жол картасын іске асыру мақсатында жылына 3 рет үйлестіру кеңесінің отырысы өткізіледі. 2018 жылғы 7 маусымда № 86 орта мектеп ғимаратында қалалық үйлестіру кеңесінің қорытыныды отырысы болып өтті. Отырыс жұмысына қалалық мәслихаттың депутаты, «Лучик надежды» қоғамдық қорының төрағасы Т.И.Кравченко қатысты.
Үйлестіру кеңесі шеңберінде арнайы білім беру қажеттілігі бар балалардың қаладағы мектепке дейінгі мекемелерде және орта мектептерде білім-тәрбие берумен қамтылуы туралы статистикалық мәліметтер келтірілді. Білім бөлімінің мамандары білім беру ұйымдарының ерекше балаларды қабылдауға дайындығы туралы жалпы мәліметтер беріп, оқу-тәрбие үдерісін психологиялық- педагогикалық жағынан сүйемелдейтін мамандардың әдістемелік бірлестігі жұмысының қорытындысы шығарылды. 
2017-2018 оқу жылында «Алмагуль», «Айналайын» бөбекжайларында 5 инклюзивті топта 19 бала жинақталған. 
20 мектепте 97 инклюзивті сыныпта 150 оқумен қамтылған. Бұл мектептер: №11 , №16,  №20, №22, №25, №27, №36, №46, №48, №54, №73, №83, №85, №86, №4, №23, №62, №42, №53, №102.
Кеңес барысында инклюзивті білім берудің мектепке дейінгі мекемелердегі жағдайы туралы «Айналайын» балабақшасының әдіскері Окружнова О.В. мен «Алмагүл» бөбекжайының меңгерушісі Қазтаева З.А. баяндама жасады. Жалпы білім беру мектептердегі инклюзивті білім берудің даму жолы туралы ИББ тәжірибе алаңы болып табылатын № 25, 54 мектептердің үйлестірушілері мен №27 мектепте орналасқан Республикалық ресурстық орталықтың үйлестірушісі сөз сөйледі.   
Үйлестіру кеңесі отырысының соңында инклюзивті білім беруді дамытудың 2018-2019 оқу жылына арналған міндеттері белгіленді. 
08.06.2018 16:45