Арқаның ақ түтек бораны көз аштырмай, қадым жерге жүру қиындап тұр...            Соған қарамастан, астаналық қонақтарымыз:  Қазақ поэзиясында өзіндік орны бар, өлең өлкесіндегі шоқтығы биік ақындардың бірі, Халықаралық «Шабыт» фестивалінің лауреаты, Төлеген Айбергенов атындағы мерекелік медальдің иегері, «Соңғы раушан», «Бекзат», «Сүйесің, жүрек, сүйесің» жыр кітаптарының авторы, Жалпыұлттық Республикалық «Егемен Қазақстан» газетінің бөлім меңгерушісі Асан Мирас Болатұлы мен ақын, «Қағаз жүрек» жыр кітабының авторы, Халықаралық «Шабыт» фестивалінің лауреаты, Мемлекеттік «Дарын» жастар сыйлығының иегері, «Хабар» телеарнасының журналисі Байбұланова Жадыра Төкенқызы алыстан ат терлетіп №17 ЖББО мектебінің оқушыларымен кездесуге келді.  

«Өнегелі өмір»жобасы аясында  өткізілген «Өлең, Сені маған қосты Құдірет…»  атты іс-шараға оқушылар мен ұстаздар қауымы қатысты.  Өмірлері өлеңмен өрілген бір отбасыдағы қос ақынмен әдемі әңгіме өрбіді.  Өлеңдері түрік, әзербайжан, испан, қырғыз тілдеріне аударылған ақындардың әнге айналған өлеңдері шырқалып, оқушылар ақындарға деген көкейлеріндегі сұрақтарын қойды. Жырдан қонақкәде жасалып, әнмен әрленді. Оқушылар ақындардың өлеңдерін бейнелеп, ақындар болса өз өлеңдерінің атауын тапты. Ақындар  «Кәусар» оқушылар шығармашылық клубының тұсауын кесіп, жас буынға ақжол тіледі. Көздерінде от ойнаған, жалындаған жас буынды көріп ақындарымыз да риза болды. Мирас ақын естелікке қолтаңбасымен "Сүйесің, жүрек, сүйесің" кітабын сыйға тартты.