Жыры - жақұт, әні - асқақ

Жыр оқы деп қолқалап қоймадыңдар,

Жарқылдауға шамам жоқ, бойымда мұң бар.

Мені құрмет тұтқаның үнімді емес,

Жырларымды оқы да, ойларымды ал,

Ойларымды ал, сонан соң ойланыңдар  

Ф. Оңғарсынова

27 желтоқсан күні, көркемсөз майданында ақын мен жазушыға тән ерлік, батылдық, адалдық, ұлтжандылық, намысқойлық және адамгершілік секілді қасиеттердің биігінен көрінген біртуар ақын, халық жазушысы, Мемлекеттік сыйлықтың лауреаты Фариза Оңғарсынованың туғанына 80 жыл толуына орай мектеп кітапханасында «... Жыры - жақұт, әні - асқақ»  атты поэзия сағаты болып өтті. Ақын өмірбаянымен танысқан оқушылар поэзия патшайымының өміршең, отты жырларынан өздеріне жақын өлеңдерін зор ықыласпен оқыды. Мұқағали ақынның  Фаризаға арнап  жазған өлең шумағы да назардан тыс қалмады.  Домбыраның күмбірлеген қоңыр үні мен қоңыраудың сыңғырлаған үні поэзия сағатының нүктесін қойды. Бірақ, әр жүректе, ақынның отансүйгіштік рухты оятатын, туған халқын сүюге, құрметтеуге, оның дәстүрлері мен мәдениетін қастерлеуге шақыратын әдемі әлемі, өлең әлемі жалғасын тауып кетті.