Қараша айының 16 күні № 17 ЖББОМ «Ұлы дала мұрагерлері» форумы ұйымдастырылды. Мектептің акт залында «Қазақтың 100 әні» жобасы аясында «Біз-Ұлы дала Ұрпақтарымыз!» атты концерт өткізілді. Шараның мақсаты — шәкірттер арасында халық және  тәрбиелік мәні зор  әндерді насихаттау. Концерт барысында оқушылар Әсет Бейсеуовтың, Шәмші Калдаяқовтың т.б композиторлардың  әндері орындап, жиналған көрерменді өнерлерімен тәнті етті. Концерттің келесі бөлімінде ата-аналармен «Әнімді жалға» атты ойын ұйымдастырылып, ата-аналар оқушылармен бірге ән шырқады.  

«100 күйдің тарихы» жобасы аясында «Күй – құдірет, күй – кие» атты сайыс өткізілді. Сайыс төрт кезеңнен тұрды: таныстыру, сұрақ-жауап, өнер бәйгесі және күй тартыс. Алғашқы кезеңдерінде оқушылар қазақ күйінің тарихына бойлап, қазақтың атақты күйшілерінің күйлері, халық күйлері төңірегінде білімдерін сынға салса, күй тартыс кезеңінде қатысушылар Құрманғазы, Тәттімбет, Дәулеткерей т.б. күйшілердің күйлерін тартып жиналған көрерменнің құлақ құрышын қандырды.