Бүгін яғни 24 қараша күні Қарағанды қаласы білім бөлімінің Нұркен Әбдіров атындағы жалпы білім беретін мектебінде 6-8 сынып оқушыларымен ҚарУ-дың Құрметті қызметкері, шет тілдері факультетінің доценті, білім саласындағы түрлі марапаттардың иегері, белгілі ғалым тіл жанашыры Жаңбырбай Қағазбаевпен сыр-сұхбат өтті. Іс-шара «Өнегелі өмір» және «Ағалар мектебі» жобалары аясында ұйымдастырылған болатын. Жаңбырбай Ахметұлы өзінің балалық шағы туралы жылы естеліктерімен бөлісіп, оқушыларға өмірлеріне керек ақыл-кеңестер айтты. Кездесу барысында оқушылар әсем күй шертіп, ағылшын тілінде әуезді өлең оқыды, спикерге таласа сұрақ қойды. Іс-шараның мақсаты - жас ұрпақтың отансүйгіштік қасиетін нығайту, білімге құштарлығын арттыру. Жалпы бұндай кездесулер мектеп қабырғасында білім алушыларға әртүрлі салада үлкен жетістікке жеткен тұлғаларды үлгі ете отырып, өздерінің болашақ өмір жолын айқындауға, биік армандарға ұмтылуға ынталандырады.