«ЕРЛІК – ЕЛГЕ МҰРА, ҰРПАҚҚА-ҰРАН»

    Мектебімізде  өткен «Өнеглі өмір» жобасы аясында  Кеңес әскерлерінің Ауғанстан жерінен шығарылғанына 33 жыл толуына орай «Жас Сарбаз» сыныптарының қатысуымен «Ерлік – елге мұра, ұрпаққа-ұран»   атты ерлік сабағы өткізілді. Бұл кездесуге ҚР ІІМ Б.Бейсенов атындағы Қарағанды Академия бастығының көмекшісі З.Ғ.М. полиция полковнигі, ауған соғысының ардагері Токтабеков Сергали Жумагулович қатысты.

    Кездесуді құттықтау сөзбен мектеп директоры Баграмова Гульшат Тлеукабыловна ашты. Ол өз сөзінде ауған соғысының тарихы жайлы баяндап өтті. «Біз Жас Сарбаздарды өз Отандарын сүюге, қазақ елінде туып-өскендерін мақтан тұтатындай етіп, патриоттық рухта тәрбиелеуге тырысамыз. Қазіргі бейбіт заманның өзінде де жер шарының бір бұрышында соғыс өрті лаулап, онда жазықсыз жандардың мерт болып жатқанын, соларды қорғау жолында біреулер асқан ерлік көрсетіп жатқанын оқушылар білуге тиіс. Осыған орай әскери-патриоттық тәрбие аясында өткізіліп отырған бүгінгі іс-шараға қатысуға тілек білдірген ардагеріміз  Сергали Жумагуловичке мектеп әкімшілігі атынан мың да бір алғыс айтамын», – деді мектеп директоры. Ерлік сабағы барысында ардагеріміз   өзінің өмір баяны туралы, ауған соғысында атқарған міндеті туралы айтып берді және Жас Сарбаздар қонағымызға өздерін толғандыратын сұрақтарын қойып, тиісті жауаптарын алды.

    Сонымен қатар іс-шараға қатысушылар соғыста қаза тапқан жауынгерлерді бір минут үнсіздікпен еске алды. Кеш соңында қонағымызға мектеп директоры Гульшат Тлеукабылқызының атынан алғыс хат табысталып, Жас Сарбаз Бакриев Диас өзінің әдемі әнімен кешімізді аяқтады.

   Бұл ерлік сабағына қатысқан Жас Сарбаздар ешқашан ұмытпастай тамаша әсер алды.

Рахимжанов Е.