Ағымдағы жылдың 26 қараша күні мектебіміздің 8 «а» сынып оқушылары мектеп кітапханашысының жетекшілігімен Орталықтандырылған кітапханалар жүйесінің «Жасөспірімдерге қызмет көрсету» кітапханасында  өткен іс-шараға белсенді қатысып қайтқан болатын.
Биыл поэзия падишасы, ақын, Қазақстанның халық жазушысы, көрнекті мемлекет және қоғам қайраткері артына өлмейтұғын мұра қалдырған Фариза Оңғарсынованың 80 жылдық мерейтойына орай  әдеби кештің куәсі болдық.

Кітапханашы оқушыларға ақын қыздың өмірбаяны мен шығармалары жайында мол мағлұмат берді.

Фариза Оңғарсынова аса көрнекті ақын, қоғам қайраткері бола білді. Ол өзінің өміршең отты жырларымен халықтың ыстық ықыласына бөленіп, елдің жұмыр жүрегінен мәңгілік орын таба білді. Бүгінгі таңда поэзия патшайымның өлеңдерін күллі қазақ баласы сүйіп оқып, жатқа айтатыны жасырын емес. Себебі, ақынның өлеңдерінде ұлттық рух, мөлдір махаббат, тербеткен сағыныш бар. Ал, композиторлар қауымы болса, оның өлеңдерін сүйіп қана қоймай, ақынның сүбелі сөздеріне небір мағыналы, мазмұнды әндер де шығарып жүр.

Сондай-ақ, жыр сүйер қауым
 «Кеш аясында оқушылар  аяулы ақынның өлеңдерін оқып, сөзіне жазылған әсем әндер шырқады. Әдеби кешті тамашалауға келген патша көңілді көрермен «Жаным-дала, көгінен бұлт арылмай», «Айналайын, Оралым», «Қимастарым», «Фариза, Фариза жан, Фариза қыз» секілді туындыларды тыңдап, рухани азық ала алды.

«Өлең ұқпайтын жандар да, Құдіретін жырдың сезсін бір» деп жырлаған ақын артына өшпес мұра қалдырып кете барды… Қара өлеңнің құдіретін сезінетін қазақ жұрты барда Фаризаның есімі ешқашан ұмытылмайды. Қалам иесінің өзі кетсе де, соңында саф алтындай сөзі қалды. Ақынның сезімге суарылған өлеңдері адамзаттың жүрегінде өмір сүретіні анық.

Кештен рухани байып қайтқан оқушылар ақындықтың тылсым сырын ұққандай болды.

Кітапхана меңгерушісі

Мақпал Жанат