Ағымдағы жылдың 23 қазан күні Қарағанды облыстық «Зағип және нашар көретін азаматтарға арналған кітапхана» жыл сайынғы дәстүрлі «Ашық есік» күнін өткізді. Ашық есік күніне мектебіміздің 9 «А» сынып оқушылары мектеп кітапханашысы мен бірігіп барып қайтқан болатын. Оқушыларды жылы қабылдаған кітапханашылар, оқырмандарының кітапханаға басқан алғашқы қадамдарын кітапханаға оқырман болып тіркелуден бастады. Одан әрі кітапхана бөлімдерімен танысу болды.

Шара барысында зағип жандарға арналып ұйымдастырылған техникалар мен құралдар көрмесі, кітапхананы екінші үйіндей көрген зағип жандарға арасында байқау өтіп, оқушылар кітапхана жұмысымен танысты.

Аталмыш кітапханада зағип жандар мен көзі нашар көретін азаматтардың ыңғайына қарай кітап оқуға барлық жағдай қарастырылған. Шара аясында кітапхана қызметкерлері қонақтарды бөлімдер бойынша аралатып оңалту кабинетінде «Саусақ ұшындағы әлем» атты тифлоқұралдар және «Біздің басылымдар» атты кітап көрмесі мен дыбыс жазу студиясының жұмысымен таныстырды.

«Daisy» форматындағы кітаптарды жасау, редакциялау жөнінде мағлұмат алды. «Daisy» форматындағы деп отырғанымыз – көру қабілетінен айырылған жандарға арнап арнайы студияда дыбыс арқылы жазылатын диск-кітаптар. Кітапханаға келетін зағип жандар осындай дыбысталған кітаптардың көмегіне жүгінеді.

Зағип жандар кітаптағы бедерлі нүктелерді саусақ ұшымен сезіну арқылы оқиды.

Кітапханадан жақсы рухани ақпаратпен сусындаған оқушылар экскурсия соңында суретке түсті.

Оқушылар өздерінің кітапханаға деген жылы лебіздерін, тілектерін "Тілек тақтасына" қалдырды.