Қазақстан Президенті Қасым-Жомарт Тоқаев Жолдауында «Ұлттың жаңа болмысы» деген мәселеге ерекше тоқталды. Мемлекет басшысы «Қазіргі міндет – халқымыздың жаңа болмысын қалыптастыру, тұтас ұлт сапасын арттыру. Ұлтымыз жаңа сапаға көшуі үшін біздің күнделікті өмірлік ұстанымдарымыз да өзгеруі керек. Қазақ қоғамында жаңа қағидаттар және жаңа бағдарламалар салтанат құруға тиіс. Біріншіден, жиырма бірінші ғасырдың ұрпағы терең білімді болғаны жөн. Қазақ зиялыларының жаңа кезеңдегі міндеті – ұлт болмысының жаңа қағидаттарын орнықтыру. Сондай-ақ, ұлт сапасын арттыруға атсалысу және кітап оқуды қолдау, дамыту – жалпыұлттық міндет болуы тиіс. Бұған мемлекет те, қоғам да бірінші кезекте мүдделі болмайынша алға өрлей алмаймыз. Ұлттың жаңа болмысын білімді, көзі ашық, парасатты, іскер, қайратты қазақ жастары қалыптастырады. Осыны есте ұстау керек!»- деп атап көрсеткен болатын. Осы орайда М.Жұмабаев атындағы №39 гимназия әкімшілігі, қазақ әдебиеті, орыс әдебиеті, бастауыш сынып пәні мұғалімдері, сынып жетекшілер және кітапханашылар «Кітап оқу сәні» сағатын талқылап, кітап оқуды дәріптеу бойынша кешенді іс-шара жоспарын әзірледі. Оқушыларға жасына сәйкес шығармалар ұсынылды. Сонымен қатар, әр бейсенбі күні «Кітап оқу сәні» сағаты болып белгіленді.