13 қыркүйек күні "Қазақ тілі - мемлекеттік тіл" тақырыбында директор жанындағы отырыс өтті. Тілдер ресурстарының бөлім басшысы Жақанова Жұпар Рысқұлқызының қатысуымен Латын қарпіне көшу мәселелері бойынша біршама әңгіме-сұхбаттар жүргізілді. 9-сыныптарға арналған "Латыннегізді қазақ әліпбиі" факультатив сабағының 34 сағатқа негізделген бағдарламасы әріптестер алдына ұсынылып, бағдарлама авторы тәжірибелі де білікті ұстаз - Орден Сұрағанқызы "Ұлттық әліпби" жобасының   құрылымына тоқтала кетті.

       #krglatyn#latyndyqolda Өткен аптада басталған мемлекеттік тілді ұлықтауға арналған іс-шаралар әлі де жалғасын тауып жатыр. Соның бір дәлелі бүгін қаламыздағы Мағжан Жұмабаев атындағы №39 гимназияда директор алдындағы отырыс болып, мекемеміздің атынан қатысып қайттым.Шыны керек, осы шаңыраққа түрлі себеппен бірнеше рет келіп, көңілім толып қайтатын. Бұл жолы да үмітім алдамапты. Отырысты ашқан гимназия директоры Абылай Жәлелұлы тілдер мерекесінің маңызына кеңінен тоқталып өтіп, әрі қарай ҚР Тілдер күнін атап өтуге арналған іс-шаралардың есебі берілді. Маған сөз кезегі келгенде қазақ жазуын латын графикасына көшіруге байланысты дәл қазіргі уақыттағы тілдік ахуалға қысқаша тоқталып кеттім.Сонымен, ең бастысына көшейін. Гимназияда мектепішілік "Ұлттық әліпби" жобасы қолға алыныпты.  9-сыныптарға арналған "Латыннегізді қазақ әліпбиі" факультатив сабағының 34 сағатқа негізделген бағдарламасы әзірленіпті. Бағдарлама авторы тәжірибелі де білікті ұстаз - Орден Сұрағанқызы. Аталған бағдарлама мақсат-міндеттері айқын көрсетіліп, негізгі білім стандартына сай сауатты жасалған екен. Ал мектепішілік  "Ұлттық әліпби" жобасына келетін болсақ, жауапты мамандардың айтуынша, 3-9 сыныптар арасында биылғы жылдың 15 қазанынан бастап, келер жылдың 15 наурызы аралығында түрлі жұмыстар қолға алынбақшы.Білім және ғылым министрлігі тарапынан арнайы бұйрық шығарылып, латынға байланысты нақты тапсырмалар берілмегенімен, ұлт болашағын ойлайтын, жаңалықтан қалыс қалмайтын, сонау 2016 жылдан бастап латыннегізді әліпбиге қатысты ауқымды жоба аясында жұмыс істеп жатқан әріптестеріме риза болдым.Иә, қазір қазақ жазуын латынға көшіруге байланысты қоғамды түрлі пікірлер қалыптасқан. Әйтсе де білім саласындағы мамандар дәл осы әріптестерімдей қызу жұмыс жасар болса, Қарағанды өңірінде нәтижеге тез арада қол жеткізуге болады. Жақсы бастамаға қалалық білім бөлімі  қолдау көрсетеді деген ойдамын.Ең қызығын айтайыншы. Әдетте, біздің мекеменің, яғни, "Ресурстық тіл орталығының" мамандары тренингтер өткізгенде, ағылшын тілін оқығандар үшін жаңа әліпбиді меңгерудің қиындық тудырмайтынын жарыса айтып жатамыз. Содан ағылшын тілінің мұғалімі қасыма келіп: "Мен үшін жаңа әліпбиді меңгеру оңай деп айта алмаймын, үнемі мына әріптерді ағылшынша дыбыстап кетемін", - деп тұр ғой. Мен  ойланып қалдым. Ал сіздер қалай ойлайсыздар? – деп, өзінің facebook парақшасында тілдер ресурстарының бөлім басшысы Жақанова Жұпар Рысқұлқызы пікір қалдырды.