2018 жылдың  10 ақпанында   Қарағанды қаласының №41 жалпы білім беретін орта мектебінде  кезекті қамқоршылық кеңес отырысы өтті. Отырысқа қамқоршылық кеңес мүшелері, мектеп әкімшілігі және Қарағанды облысының білім саласын бақылау департаментінің бас маманы Р.Келбетова қатысты.  Қамқоршылық кеңестің күн тәртібінде:  соңғы үш айдағы  мектеп жетістіктері,білім ұйымдарындағы діни сауаттылық туралы, 2018-2019 оқу жылында оқу жоспарының вариативті бөлігінің оқу жүктемесін бағыттау, Елбасы  Жолдауының «Адами капитал – жаңғыру негізі» жетінші бағытын негізге ала отырып мектептің даму стратегиясын  іске асыру  негізінде жоба жұмыстарына қолдау көрсету туралы  мәселелер қозғалды. 

       Бұл жұмыстарды  іске асыруда техникалық, материалдық қолдау қажеттігі  мен  шешу  барысында  қамқоршылық кеңестің атқаратын жұмыстарының  басты бағыттары қаралды.  Күн тәртібіндегі бірінші мәселе бойынша  қамқоршылық кеңестің төрағасының орынбасары Мәди Перизат Шаймұратқызы  соңғы үш  айдағы мектеп оқушыларының жетістіктері туралы  сөз қозғады . Өз сөзінде мектеп ата-аналары мен ұстаздары арасындағы электронды чат «Telegram» арқылы  мектеп жаңалықтарының  ата-аналарға уақытылы жеткізіліп отыратындығын  айтып өтті және алдағы уақытта  білім саласындағы жаңалықтармен хабардар ету мақсатында  чат «Telegram»  мектептің барлық ата-аналарының қосылуын қамтамасыз ету бағытында мектеп әкімшілігімен бірігіп,  жұмыстар жүргізетіндігін айтып өтті.   Екінші мәселе бойынша  қамқоршылық кеңестің мүшесі А.Б.Далдабаева  білім ұйымдарындағы діни сауаттылықтың жүргізілу мәселелері туралы  ақпарат бере отырып, білім ұйымдарындағы діни атрибуттардың қолданылуы, оқушылардың хиджаб кию мәселелері  талқыланды. Бұл мектепте хиджаб киетін, діни ұйымдарға баратын оқушылар болмаса да,  ақпараттық-түсіндірме жұмыстарының оқушылар мен ата-аналар арасында үнемі жүргізілу қажеттігіне тоқталды.  Қамқоршылық кеңесі бұл мәселеге қатысты мектеп жарғысына  толықтырулар енгізуге ұсыныс жасады. Үшінші мәселе бойынша мектептің 2018-2019 оқу жылында вариативті бөлігінің оқу жүктемесінің бөлінуі туралы  мәселе талқыланды. Бұл бағытта қамқоршылық кеңесі мүшелерінің оқушылар арасында сауалнама жүргізуі арқылы олардың қызығушылығын анықтағандығын  сөз ете отырып, 2018-2019 оқу жылында вариативті бөлігін бөлуде осы сауалнаманың қорытындысын ескеруді ұсынды.

Төртінші мәселе бойынша  Елбасы  Жолдауының «Адами капитал – жаңғыру негізі» жетінші бағытын негізге ала отырып,  мектептің даму стратегиясын  іске асыру  негізінде  қамқоршылық кеңестің жоба жұмыстарына, оның ішінде  “Жер қадірін жүрген білер”  және «Білім ұясына құрмет» жобаларына  қолдау көрсету мәселелері талқыланды.  Бұл бағыттарды іске асыруда мектеп түлектерін, жоғары оқу орындарын, ата-аналарды тарту арқылы шешу туралы шешім қабылдады.