«Ұлы адамдар өз ескерткіштерінің тұғырын өзі орнатады, мүсінін болашақ соғады» демекші, бұл күні тағылымы – тарих, білімі – мұхит, сөзі – әфсана. Ахмет ашқан қазақ мектебі, Ахмет түрлеген ана тілі, Ахмет салған әдебиеттегі елшілдік ұраны-болып істеген еңбегі, өнер-білім, саясат жолындағы қажымаған қайратын біз ұмытсақ та тарих ұмытпайды. Ұлттық мәдениет пен әдебиеттің, білім мен ғылымның туын көтерген, «қазағым» деп жүрегі соққан, халқын алға жетелеуге ұмтылған, оның зердесіне сәуле түсіріп, санасын оятқан Алаштың рухани көсемі, тіл білімінің атасы Ахмет Байтұрсынұлының 150 жылдық мерейтойына орай ұлттың ұлы ұстазының рухына тағзым ету мақсатында мектебіміздің жанында Ахмет Байтұрсынұлына ескерткіш ашылды. Ескерткішті орнатылуына басшылық жасап, демеушілік көрсеткен ұлт жанашыры, ақын, әрі педагог Айтбай Ботбайұлы. Ескерткіштің ашылу салтанатына мектеп оқушылары, ұстаздар, ата-аналар, мектеп директорлары және Қарағанды қалалық мәслихат хатшысы Қ.Б Бексұлтанов, академик Е.А.Бөкетов атындағы Қарағанды университетінің археология этнология және Отан тарихы кафедрасы доценті, «Тұлғатану» орталығының директоры Н.А.Бейсенбекова, Қарағанды қаласы Білім басқармасының әдіскері А.Ж. Серикова, Қарағанды қаласының білім бөлімінің басшысы Е.М. Әшім, Қарағанды облысы білім беруді дамытудың оқу-әдістемелік орталығының әдіскері Г.Б. Жаркеева, Орталық Қазақстан газетінің кадр бөлімінің меңгерушісі Е.Қ.Төлеу өз жылы лебіздерін білдірді. Ескерткішті ашу мәртебесі Ахметтей ұлы ұстаздың ізін жалғастырушы мектебіміздің 4-сынып оқушысы Ахмет Кайыртаевқа бұйырды. Мектебіміздің төрінен орын тепкен Ахмет атамыздың ескерткіші - оның өмірі мен шығармашылығын келер ұрпаққа мәңгілік өнеге екендігі сөзсіз.