Мамандықтар әлемі– сыры мол дүние. Бұл әлем кейіпкерлерге толы! Құтқарушы кейіпкер, оқытушы кейіпкер, сурет салатын, бал ашатын, ән салатын және тағы басқа да кейіпкерлер. Бала кезінде көбі жылдамырақ ержетіп, бір маман иесі болуды армандайды. Кейбірі Ю.А.Гагарин мен Т.Аубакиров сияқты ғарышкер болуды, өрт сөндіруші, әйгілі актер, әнші, кейде тіпті Н.Ә.Назарбаев сияқты президент болуды армандайды. Олардың әр бірінің қызығушылығы мен таңдауы бар.

Ағымдағы жылдың 5 қазанынан 15 қазанына дейін «Мамандықтар әлемін ашамыз» атты республикалық форумның облыстық деңгейі өтіп, онда 12-17 жас аралығындағы балалар өздерінің жұмыстарын (болашақ мамандығы туралы көрініс) ұсынды. Форумға Қарағанды облысының әр аймақтарынан қатысқан 135 оқушының қатарында, біздің мектебіміздің де өкілдері болды.

15 қазан күні Балалар мен жасөспірімдер сарайында форумға қатысушыларды марапаттау рәсімі өтті. Нәтижесі келесідей:

1.     Форумға қатысқаны үшін, «Мамандық таңдайтын уақыт» номинациясы бойынша, екі оқушы мадақтамамен марапатталды (Аринова Бакытжан, Мұхитбекқызы Жанерке);

2.     ІІІ дәрежелі дипломмен, «Мен мамандықтар әлеміндемін» номинациясы бойынша екі оқушы марапатталды (Шапенова Зарина, Ешімханова Балжан).

Сонымен қатар, жетекшісі Темірғалиева Жанар Қайратқызы форумға қатысушыларды үздік дайындағаны үшін марапатталды. Ал форумды өткізуге белсене ат салысқаны үшін мектебімізге алғыс жарияланды.

Жеңімпаздарымызды тағы бір мәрте құттықтай отырып, оларға шығармашылық жетістіктер тілейміз! Жарайсыңдар!