Тіл – ұлттың жаны, татулық пен бірліктің кепілі.

             Осы бір жолдардың дәлелі ретінде мектебімізде 22 қыркүйек - Қазақстан халықтарының Тілдері күніне орай мемлекеттік тілдің қолданылу аясын кеңейту, мәртебесін арттыру, насихаттау мақсатында «Қазақ тілін білемін» атты 4 сынып оқушылары мен аналарының арасында өзара сайыс өткізілді. 4 сынып оқушылары Камалиев Рузель, Быкова Дарья, Ряскова Полина, Шмидт Нелли өздерінің аналарымен қазақ тілі білгірі бәсекесінде барша көрерменді өнер-білімдерімен тәнті етті.

            «Өзін таныстыру» атты сайыстың І кезеңінде үміткерлер өздерін қазақ тілінде таныстырып қана қоймай, отбасылары, қызығушылықтары жайлы да сөз қозғады. «Сен білесің бе?» атты сайыстың ІІ кезеңі мемлекеттік рәміздерге арналды. Дәл осы тақырып Тәуелсіздігіміздің 20 жылдығына орай таңдап алынды. Мемлекеттік Ту, Елтаңба, Әнұран төңірегінде сұхбат өрбіткен сайыскерлеріміз әртістік шеберліктерімен де көзге түсті.  Сайыс одан әрі «Тіл құдіреті» кезеңіне ұласып, мұнда қатысушылар тақырыпқа байланысты өлең шумақтарын, қарасөздерді нақышына келтіре оқыды. «Шебер қолдар», «Берекелі дастархан» кезеңінде сайыскерлер өздерінің қолдарынан шыққан түрлі туындыларын көрермен назарына ұсынып, қазақ халқының ұлттық тағамдарымен әділқазы алқасын риза етті. Сайыс соңында қатысушылар «Қазақ тілінің білгірі», «Алтын дауыс», «Шебер қолдар», «Сахана саңлағы» номинациялары бойынша марапаттталып, сыйлықтарға ие болды. Сайыстың әр кезеңі оқушылар дайындаған әдемі ән-бимен өріліп, көпшілікке көтеріңкі көңіл күй сыйлады. Осы сайысқа қатысуда ата-аналардың шын ықылас танытып, жан-тәнімен беріле дайындалғандықтары жүрекке жылу ұялатады. Ал іс-шараға жүргізушілік еткен 4 сынып оқушысы Караваева Арина және қазақ тілі пәнінің мұғалімі Құралай Ақжолқызы тек сахана сәнін кірігізіп, сайыстың көркін қыздырды.

            Жүздері бал-бұл жанған ата-аналар мен оқушылар осындай сайыстың өткізілгеніне алғыстарын айтып, мәре-сәре болып тарқасып жатты. Ендеше, бұл біздің де көздеген мақсатқа қол жеткізгеніміз. Мемлекеттік тіліміздің мерейі үстем болсын, ағайын!

Фотосуреттер