Грэпплинг (ағылш. Grappling, SubmissionFighting, SubmissionWrestling, No-GiGrappling) —барлық  күрес тәртіптері техникалары қатар қолданылатын, ауыртатын және  тұншықтыратын әдістерді пайдалану бойынша шектеулері аз спорттық жекпе-жектің түрі. Күрестің бұл түрінде соққы жасау және қару қолданылмайды. Ұрысты ауыртатын және тұншықтыратын тәсілдер арқылы жылдам аяқтауға ұмтылу грэпплингтің негізгі ерекшелігі болып табылады. Себебі, күрестің кейбір түрлерінде позициялық басым жағдай туғызу (еркін күрес және грек-рим күресі) немесе қарсыласты жығу және басқа да техникалық әрекеттер (дзюдо, самбо)  үшін ұпай жинау арқылы жеңу негізгі мақсат болып табылады. Грэпплингтің тағы бір ерекшелігі киім үлгісінде. Спортшының киімі шолақ шалбардан және рашгардтан (қысқа және ұзын жеңді тартып тұратын жеңіл жейделер) тұрады. Киім ұрыс кезінде ешкімге басымдық бермеу үшін денеге жабысып тұруы қажет.