Жалпы адамды интернетте, әлеуметтік желі мен түрлі мессенджерлерде қорқытып, зорлық көрсету кибербуллинг деп аталады. Бірақ бұл тәсілмен шабуыл жасайтындар негізінен кәмелет жасына толмаған мектеп оқушыларын нысанаға алады. Өйткені, қорғансыз балалар қорыққанынан өзіне қысым жасалып жатқаны туралы ешкімге айтпайды. Тіпті, ата-анасы мен жақындарына тіс жармай, шабуылшының айтқанынан шықпайды.
Осындай құқық бұзушылықтың алдын алу мақсатында Қарағанды қаласы білім бөлімінің №16 ЖББМ КММ-нде мектептің 5-8 сынып оқушыларымен тренинг және ашық сабақтар өткізілді.
Бұл мектеп ішілік іс-шара барысында мектеп директорының тәрбие ісі жөніндегі орынбасары С.С. Тусупбеков «Мұндай құқық бұзушылық үшін келтірілген залалға байланысты әкімшілік, азаматтық-құқықтық және қылмыстық жауапкершілік көзделгендігін», ал мектеп психологтары А. Мухамадалиева, Л.Қ. Карипбаевалар «Буллинг пен кибербуллинг - адам психикасының өрескел бұзылуына, сонымен қоса бір адамның немесе адамдар тобының екінші адамға қасақана және үнемі зиян келтіруіне әкелетінін» түрлі мысалдармен оқушылардың қаперлеріне жеткізді.
Оқушылар аталған іс-шараға белсенділік танытып, өздері толғандырған ойларын ортаға салды, сұрақтар қойды, қанағаттанарлық жауаптар алды.