Жақында 12-19 қараша аралығында мектебімізде қазақ тілі мен қазақ әдебиеті пәні апталығы болып өтті. Апталық жоспары бойынша әрбір сынып оқушылары түрлі іс- шараларға қатысып, мемлекеттік тілді жоғары деңгейде меңгергендіктерін көрсетті.Тіпті бастауыш сынып оқушылары да өз үлестерін қосты. Бастауыш сыныпта қазақ тілі пәні мұғалімі Айнабаева Мира Маратовна дайындаған «Үй жауарлары» атты іс- шарада 2- сынып оқушылары өз ойларын қазақ тілінде шебер жеткізіп қана қоймай, төрт түлік туралы өлеңдер, мақал-мәтелдер айтып, көпшіліктің ойынан шықты. Ал 3 «в» сыныбында мектебіміздің жас болса да, беделді мұғалімдеріміздің бірі Молдабаева Жанна Сапаровна «Ұлттық тағамдар» тақырыбында сайыс сабағы өткізілді. Сабақ барысында әр түрлі тапсырмалар, сұрақ-жауап, жазбаша жұмыс, сызба-тіректер тақтадан көрсетіліп отырды. Сабақтың мақсаты: ұлттық тағамдар туралы мәліметті тереңдету, ұлттық тағамдар қасиеті туралы айту. Сайыс бірнеше бағыттары бойынша өтіп, оқушылардың жылдам ойлау, мазмұнды сөйлеу, қорытындылар жасау қабілеттерін дамытуға бағытталды. Сайыс бірнеше тапсырмалардан тұрды: сауатты жазу сайысы, менің сүйікті тағамым, мақал – мәтелдер сайысы, блиц сұрақтары, топ басшылар сайысы. Екі топ оқушылары әр тапсырма бойынша өз білімдерін көрсете білді.Оқушылар сөздерге антоним тауып, сызбаға сәйкес сөйлемдер, тақырып бойынша мәтін құрастырып, деңгейлік тапсырмалар орындап, әр түрлі сөзжұмбақтарды шешіп өзара жарысты. «Септіктер сарайына саяхат» атты 4 «б» сыныбында Аушарипова Гүлмира Қабылдаевнаның ашық сабағы болды. Сабақ барысында мұғалім жұмыстың көптеген түрлерін қолданды. Сабақ оқушылардың жақсы білімін, ауызекі тілдерінің жақсы деңгейін көрсетті.
Орта буын оқушылары да осы апталықта қарап қалған жоқ. «Қандай да болсын халықтың әдет- ғұрпын білгің келсе, алдымен оның тілін білу керек» деп Пифагор айтқан екен. Сол сияқты біздің мектептің оқушылары қазақ тілін меңгеріп қана қоймай, қазақ халқының салт- дәстүрлерін де жетік білетіндерін көрсетті. Қазақ тілі пәні мұғалімі Қаңтарбаева Гүлмира Абдиманапованың ұйымдастыруымен өткізілген іс- шара осының куәсі деп айтсақ қателеспейміз. «Қазақ халқы - қонақжай халық» деген сөз бар. 5 «г» сынып оқушылары дайындаған салт- дәстүрде сәлемдесуден бастап, төс қағыстырып, дастарқан басына шақыруды «Дәм-тұздан артық еш нәрсе жоқ» деп жалғастырды.
Келесі кезекте, 5 «г» сынып оқушылары көрермендерді көрші ауылға қонаққа шақырды. Ал, көрші ауылда оларды «Бесікке салу» салтанаты күтіп тұр еді. Осы оқушылардың қатысуымен бесік той дәстүрлдері көрсетіліп, қыздар «Бесік жырын» шырқады.
Көрермендерді енді тағы да бір ауыл күтіп тұр еді. Бұл 5 « в» сынып оқушылары дайындаған «Тұсау кесу» тойы еді. Бұл тойда да оқушылар өз өнерлерін көрсетті.
Қазақ халқының кез-келген той- томалағы ойын- сауықпен жалғасады. Осы ойындарда балалар жеңіс мәресінен көрінді. Той- томалақты қызықтаған көпшілік оқушылардың өнеріне дән риза болып тарқасты.
5 «б» сынып оқушылары «Нан дастарқанға қалай келеді?» атты (мұғалімі Жакашева Н.Х.) ашық сабақ өткізсе, 6- сынып оқушылары қазақ тілі мұғалімі Дюсекова А.Ж. жетекшілігімен «Менің Республикам» тақырыбында сыныптан тыс іс шараға шақырды. «Тағамның алуан түрлігі» атты 8 «а» сыныбында Бижанова Сандуған Тұрсынгалевнаның ұйымдастыруымен өткізген интерактивті сайыс сабағы өтті. Сабақтың түрі: тақырыпты қайталау, бекіту сабағы. Сабақта мұғалім интерактивті тақтаны кеңінен қолданды. Апталық 8- сынып оқушыларының қатысуымен өткен «Ас мәзірі» атты сабақпен жалғасты. Бұл сабақ - технология пәнімен біріктірілген ашық сабақ болды.Сабаққа мектебіміздің дәрігері қатысып, қажетті кеңесін берді. Қазақ тілі пәні мұғалімі Казиева Б.А. басқаруымен өткен осы бір іс- шарада оқушылар өз өнерлерін ортаға салды. Осы сабақта оқушылар «Дастарқан басында сақталатын ырым-тыйымдар», «Дастарқанды сәндеу ережелері», «Тамақтану әдебі», ас мәзірін жасау жөнінде мағлұмат алды. Оқушылар «Дәмхана» тақырыбында көрініс көрсетті. Ас болған жерде бата берілетінін бәріміз білеміз. Ендеше сабақ соңында батаға кезек берілді.
Ал 7,8,9-сынып оқушыларының ұйымдастыруымен (мұғалімі Боқаева) өткен «Тілім менің –тірегімнің айғағы» деп аталатын білімпаздар сайысында оқушылар мемлекеттік тілді қандай дәрежеде меңгергендіктерін көрсетті.
Апталықтың соңында ӘБ жетекшісі, өз ісінің білгір маманы, шебері Алшымбекова Нұрдана Муслимоваменапталық қорытындысы шығарылып, апталық барысында белсене қатысқан оқушылар мен жарыс жеңімпаздары аталып, сыйлықтармен марапатталды.
Апталықтың бекітілген жұмыс жоспарындағы барлық іс-шаралар мазмұнды, мағыналы, сапалы өткізілді.
«Тіл адамды көкке көтереді, тіл арқылы ел бақытқа жетеді» деген екен
Жүсіп Баласағұни. Мектебімізде өткен қазақ тілі апталығы мемлекеттік тіліміздің мәртебесін көтерді деп айтсақ қателеспейміз.
