«Келешек мектептері» ұлттық жобасы аясында Қарағанды қаласындағы №19 мектепте заманауи талаптарға сай инновациялық білім беру ортасы қарқынды дамып келеді. Бүгінде мектеп қабырғасында 1000-нан аса оқушыны қамтитын 20-ға жуық қосымша білім беру үйірмелері табысты жұмыс жүргізуде. Бұл үйірмелер оқушылардың жеке қабілетін ашып, жан-жақты тұлға болып қалыптасуына мүмкіндік жасап отыр. Домбыра үйірмесінде ұлттық өнердің қыр-сырын меңгеріп, күй орындаудың шеберлігіне машықтанса, қазақ күресі мен еркін күрес секцияларында жас спортшылар төзім мен жігерді, ептілік пен күштілікті қатар дамытуда. Ал танымдық-ойлау қабілеттерін дамытатын тоғызқұмалақ, шахмат, бес асық сияқты ұлттық және спорттық ойындар оқушыларға логикалық ойлау, шапшаң шешім қабылдау, қарсыласты алдын ала болжау сияқты маңызды дағдыларды үйретеді.

Мектептің «Тұлғатану» жобасы – оқушылардың өнегелі өмір сүрген тұлғаларды тануына, олардың ерлік жолы мен рухани мұрасынан тағылым алуына бағытталған маңызды бастама. Жыл бойы оқушылар түрлі салада еңбек еткен тарихи, мәдени, ғылыми тұлғалардың өмірін зерттеп, олардың еңбегімен жақынырақ танысады. Бұл – жас ұрпақ бойында ұлттық сана мен азаматтық жауапкершілік қалыптастыратын тәрбиелік мәні зор жұмыс.https://www.instagram.com/reel/DSDGmodiNQC/?utm_source=ig_web_copy_link&igsh=MzRlODBiNWFlZA==