“Армысың, әз Наурыз!” тақырыбында 3-сыныптар арасында театрландырылған іс-шара өз деңгейінде өтті. Ұлыстың ұлы күнін ұлықтап, наурызнаманың «Шаңырақ күніне» орай ата-аналар ұйымдастырған әдемі жарапазанмен басталды. Көк құт шешек атқан күнде ару қыздарымыздың биімен жалғасын тапты. Оқушылар тобынан құрылған агитбригада наурыз мерекесіне арнаған жырларын айтып, Қызыр бабамыз батасын берді. Күмбірлеген домбырамен ән, әсем дауысты әжелердің хоры көрерменнің көңілін өзіне аудармай қоймады. Ата-аналардың ұйымдастыруымен дайындалған наурыз көже мен шашылған ақ бауырсақ киіз үйдегі дастарханның көркі болды. Келер жылымыз молшылық пен байлық әкелсін деген ырымшыл халқымыздың осы дәстүрлері әрі қарай жалғасын тапты. Қариялар наурыз батасын айтып, ертеңгілігіміздің нүктесін қойдық.