04.10.19 мектебімізде ұстаздар мерекесіне орай «Ұстаз - ұлы есім!» ұранымен өткен өзін-өзі басқару күні ұйымдастырылды. Бір апта бұрын «өзін-өзі басқару» күнін ұйымдастыру жоспары жасалып, сол жоспар бойынша жүзеге асырылды.

11 - сынып оқушылары төменгі буындарға мұғалімдердің орнына сабақ берді. Оқушылар ұстаз болып, шеберліктерін байқата білді. Әрбір оқушы өзіне тиесілі сабақтарға жоғары деңгейде дайындалып, өздеріне сабақ берген ұстаздарынан алған тәлім-тәрбиелерін іс жүзінде тамаша қолдана білді. Тіпті кейбір оқушылар оқытудың жаңа технологияларын пайдалана отырып, сабақтарын қызықты өткізді.

«Өзін-өзі басқару» күнінің ерекшелігі оқушылар тек сабақ өткізіп қана қоймай, сынып белсенділері мектеп әкімшілігінің ішкі жұмыстарына да араласып, өз шеберліктерін танытты. Бірі директор болып басшылықты қолына алса, бірі тәрбие жұмысының меңгерушісі болып, бір сәт болсын өздерін білікті маман ретінде көрсете білді. Мектептің әр қабатында оқушылар сапқа тұрып, ұстаздарға ыстық ықыластарын білдіріп, мерекемен құттықтады. Түскі ауысымнан кейін 11сынып түлектері ұстаздарына арнаған мерекелік концерт ұйымдастырып, мұғалімдердің көңілдерінен шықты.