20 қыркүйек күні мектебімізде «НұрОтан» партиясының қолдауымен IT сыныбы ашылды. IT сыныбының ашылуына Қалалық білім бөлімінің әдіскері Ульбрихт Ольга Александровна келіп қатысты. IT сыныбының ашылуы барысында мектебіміздің оқушылары өздерінің ғылыми-техникалық шығармашылық жұмыстарын таныстырды.  

Елбасымыз Нұрсұлтан Әбішұлы Назарбаев «Төртінші өнеркәсіптік революция жағдайындағы дамудың жаңа мүмкіндіктері» атты Жолдауында білім саласы заманауи трендтерге және уақыт талабына сай болуын іске асыру үшін цифрлық технологиялардың енгізілуі маңыздылығын атап өтті. Осының бір дәлелі ретінде «Цифрлық Қазақстан» мемлекеттік бағдарламасын жүзеге асыру аясында мектебімізде IT сынып ашылды.

Бұл біздің оқушыларымыздың қазіргі заманғы бәсекеге сай білім алуына жасалған үлкен мүмкіндік. Аталған сыныптың ашылуындағы негізгі мақсат – оқушыларымыздың ақпараттық-цифрлық әлеуетін дамыту, жаңаша ойлайтын зияткерлік ортаны қалыптастыру, жоғары деңгейдегі  IT мамандарын дайындауға үлес қосу және оқушылардың IT технологияға қызығушылығын арттыру. Биылғы оқу жылынан бастап мектебіміздің 5-11 сынып оқушылары факультатив курстарынан бағдарламалау және робот техникасының негіздері, «3D модельдеу және анимация», «компьютерлік графика» жайында тереңдетілген білім алады. IT сыныптың берер нәтижесі өте көп. Оқушыларымыздың цифрлық сауаттылығы артып қана қоймай, олардың әлемдік ірі жобалараға қатысатын бәсекеге қабілетті маман болып қалыптасуына жағдай жасалмақ.