2025 жылдың 5 желтоқсанында «Қ.Аманжолов атындағы балалар музыка мектебі» КМҚК-да балалар музыка және өнер мектептерінің қазақ халық аспаптары бөлімінде қызмет ететін қосымша білім беру педагогтеріне арналған қалалық семинар-практикум өтті. Семинардың тақырыбы – «Балалар музыка және өнер мектептерінде қобыз аспабы мен дәстүрлі әнді оқытудың негізгі аспектілері мен өзекті мәселелері». Мақсаты: прима-қобыз, қыл-қобыз және дәстүрлі ән бағытында оқушылардың музыкалық-эстетикалық тәрбиесін дамыту, орындаушылық шеберліктерін жетілдіру және классикалық дәстүр мен заманауи әдістердің тиімді интеграциясын айқындау.
Семинар аясында педагогтер:
•    оқытудың жаңашыл әдістемелерімен танысты;
•    орындаушылық дағдыларын шыңдауға бағытталған ашық сабақтар мен шеберлік сағаттарына қатысты;
•    репертуарды тиімді іріктеу және оқу-әдістемелік материалдармен жұмыс тәжірибесін талқылады;
•    кәсіби ынтымақтастықты нығайтып, тәжірибе алмасу алаңын қалыптастырды.
Практикалық бөлімде бірқатар тәжірибелі мамандар өз жұмыс әдістерін ұсынды: Совет Ә.Ж., Сейфулгазина Ж.С., Аужанова А.Ж., Астанаева А.Ж., Мусайын А.С. «Заманауи музыка сабағы «Технологиялар + ЖИ» атты воркшоп элементтері бар авторлық сабағында жас маман Ильясова Ш.Е. цифрлық технологиялар мен жасанды интеллект мүмкіндіктерін музыка пәнін оқытуға шығармашылықпен енгізудің тәсілдерін көрсетті. Бұл тың көзқарас қатысушылардың жоғары қызығушылығын тудырып, дәстүрлі музыкалық білім берудің болашағына жаңа идеялар ұсынды. Іс-шара қорытындысында педагогтердің әдістемелік және орындаушылық біліктілігін жетілдіруге бағытталған нақты ұсыныстар әзірленіп, дәстүрлі оқу тәжірибесіне инновациялық тәсілдерді енгізу қажеттілігі атап өтілді.