Шығармашылық есеп: «Ұстаздық еткен жалықпас...»
Қарағанды қаласы білім бөлімі ӘК-нің жоспарына сәйкес 2018 жылдың 23 ақпанында «№54 жалпы білім беретін орта мектеп» КММ қазақ тілі мен әдебиеті пәні мұғалімі Қасымжанова Зулфия Зарыкбайқызының «Ұстаздық еткен жалықпас...» тақырыбында шығармашылық кеші өтті.  Кешке қала мектептерінен 60-қа жуық мұғалім қатысты. Кеш мектеп директорының оқу-тәрбие ісі жөніндегі орынбасары Талдыбаева Панаш Секенқызы мен қалалық білім бөлімінің әдіскері Жаркеева Гүлназ Бекетқызының алғы сөзімен ашылды. Мұғалімнің іс-тәжірибесін тарату мақсатында ұйымдастырылған көрмеде оқушылар ұстаздарының 25 жылдық еңбек жолындағы жетістіктерін көпшілікке таныстырды. 9-сыныппен өткен «Алашорда әдебиетінің тәуелсіздік үшін күресі» тақырыбындағы іс-әрекеттегі зерттеу сабағында мұғалімнің сөйлеу  мәнері, оқушыларды қызықтыра білуі және тарихи деректерді бере білуі, оқушы бойына рухани тәрбие сіңіре білуі  келген қонақтардың барлығына үлкен әсер беріп, көңілдерінен шықты. Сабақта мұғалім "FILA", "Мәселелерді зерттеу ағашы", "Себеп-салдар айналмасы", "5 проблемалық сұрақ және жауап" сияқты интербелсенді әдістер мен тәсілдерді қолданды. 
Келесі кезекте сабақтан шыққан мұғалімдермен жұмысты аталмыш мектептің қазақ тілі мен әдебиеті пәні мұғалімі Базарбаева Махабат Ашимхановна «Жетістікке жету өз қолыңда» атты TED конференция түрінде жүргізді.  Конференция 5  кезеңдерден тұрды. Әрбір кезең кеш иесі З.З.Қасымжанованың ұстаздық жолымен байланыстырылып отырылды. 
Кеш "Ұстаз - ұлы тұлға" тақырыбындағы шығармашылық кезеңге ұласты. Шараға арнайы шақырылған З.З.Қасымжанованың алғашқы ұстазы мен қазақ тілі, әдебиеті пәнінің мұғалімі, сонымен қатар соңғы үш жылғы түлектері жүрекжарды лебіздерін, тілектерін білдірді. Мектеп директоры Сыздыкова Асем Төкенқызының құттықтауынан кейін кештің көркін «Шамшырақ» жасөспірімдер театрының қойған М. Шахановтың «Әке үкімі» қойылымы жалғастырды. Әріптесі, ақын – ұстаз Қ.Б.Иманбековтің кеш иесімен жүргізген сұхбаты, арнау өлеңі кештің мазмұнын тереңдете түсті.
Әдіскер Г.Б.Жаркеева білім бөлімінің әдістемелік кеңесінің 29.01.2018ж. №6  хаттамасына сәйкес З.З. Қасымжановаға қалалық деңгейде шығармашылық есеп бергені үшін арнайы куәлік табыс етті.