Қалалық білім бөлімінің жоспарына сәйкес №10 ЖББОМ аясында сол мектептің және № 12 ЖББОМ  мұғалімдерінің қатысуымен қазақ тілінің жас мамандарына арналған «Оқушы мен мұғалім арасындағы ынтымақтастық» атты семинар болып өтті. 

Мақсаты - ұстаздардың оқушылармен тиімді жұмыс жасау және өзара ынтымақтастық қарым- қатынастарын анықтау, негативті ойлауды төмендету және оны оң эмоционалды жағдайға айналдыруға ықпал ету. Семинарды қалалық білім бөлімінің әдіскері Г.Б.Жаркеева ашып, мұғалім мен оқушы  қарым-қатынасының психологиясына , мұғалімнің өзіндік сапа ерекшеліктері мен белең алып отыратын кедергілер мен одан шығу жолдарына тоқталды. 

«Болашақ педагогтерге қойылатын талаптар қазіргі қоғам қажеттілігінен туындайды. Жаңа қоғам мұғалімі тек кәсіби шеберлігі жоғары адам ғана емес, рухани дамыған, шығармашыл, мәдениетті, білім құндылығын түсінетін, педагогикалық технологияларды меңгерген, ғылым мен техника жетістіктері негізінде кәсіби даярланған болуы тиіс»,- деген құнды пікір айтты. «Орта білім мазмұнын жаңарту жағдайында қазақ тілі пәнін оқыту ерекшеліктері» тақырыбында сөз қозғаған «ӨрлеуБАҰО» АҚ аға оқытушысы М.Б.Сүлейменов білім беру мазмұнындағы реформалар  негізгі  құндылықтар, педагогтың кәсіби біліктілігі, сабақтар форматы, әдіс- тәсілдері, оларды өткізу әдістемесі, оқушы жетістіктерін бағалау және мұғалім арасындағы кері байланыс тақырыптарына шолу жасады. 

  Оқушылармен қарым-қатынас жасай отырып, олардың  іскерлік дағдыларын, ой-өрісін, танымдық қабілеттерін жетілдіру мақсатында №10 ЖББОМ  мұғалімдері  Ж.О.Жақсылықов, Г.О. Сыздыковалар ашық сабақ өткізіп, іс-тәжірибелерімен бөлісті. №12 ЖББОМ мұғалімдері А.К. Елеусизова, Ә.Ж.Арыстанбекова оқушылардың әдебиет пәнінен алған білім-білік дағдыларын қолдана білуге, көшбасшылық қабілеттерінің, тұлғалық қасиеттерінің қалыптасуына ықпал ету, өзара ынтымақтастыққа тәрбиелеу  мақсатында «Әдебиет әлемінде» атты сыныптан тыс сабағын өткізді. 

Семинардың екінші кезеңі коучинге ұласты. №12 мектеп мұғалімдері Жакенова К. А мен А.З.Кудашбаева аталған тақырып төңірегінде ой бөлісіп, тәжірибе алмасты. Рефлексия кезеңінде қатысушылар семинардың жоғары деңгейде өткенін айтып, жүректерінен шыққан ақ тілектерін білдірді.