Білім бөлімінің жылдық жоспарына сәйкес қазақ  тілді мектептердің, қазақ сыныбында сабақ беретін аралас мектептердің қазақ тілі мен әдебиеті пән мұғалімдері арасында VIІІ қалалық «Қанипа Бітібаева технологияларына құрылған панорамалық сабақтар»  байқауы өткізілді. 

Мақсаты:

Инновациялық  әдіс-тәсілдерді оқыту үрдісіне енгізуді нәтижелі жүзеге асырып, Мемлекеттік тілде сабақ беріп жүрген жаңашыл педагогтардың  идеясы негізінде әдістемелік шеберлікті дамыту. Мемлекеттік тілдің мәртебесін көтеру, дамыту.  

Байқау 2кезеңде өтті. 1-кезеңде қаңтардың 15-22-не дейін жiбepiлгeн жұмыстарға сырттай сараптама жүpriзiліп, екінші тypғa10 үміткер іріктеліп жіберілді.  

Байқаудың екінші кезеңінде қазақтың біртуар ұлы ұстазы болған Қанипа Бітібаеваны еске алу мақсатымен «Дәуірдің дара ұстазы» атты кеш ұйымдастырылды.  Кеш барысында  мектеп директоры З.Р.Жантыбаева Қанипа Бітібаева туралы мәнді де мағыналы ойлар айтып өтті, қалалық білім бөлімінің әдіскері Жаркеева Г.Б. Қ.Бітібаевамен кездескен сәтінен сыр шерте отырып, еңбегі жайлы тамаша мағлұматтар берді. Кеште Қанипа апаймен сырлас болған жан досы Күліш Төлеуханқызының да жан тебірентерлік сөздері отырған көпшіліктің көзіне жас алдырды.

Байқаудың «Дәуір даналығын ілестіреді, Ұстаз білім нәрін үлестіреді» деген бөлімінде іріктеуден өткен №39 мектеп-гимназияның мұғалімі Альжанова М.Ж. 7-сыныпта, №6 ОМ мұғалімі Тілеген А.Б. 6-сыныпта, №10 ОМ мұғалімі Сыздықова Г.О 5-сыныпта ашық сабақтар өткізді. «Мұғалім ізденісі – шығармашылық тұлғаның бастауы» деген бөлімде 7 мұғалім өзінің панорамалық сабақтарын қорғады. Бұл ұстаздардың еңбегін бағалайтын әділқазылар алқасының құрамында  Шаймұрат Сәулеш Шаймұратқызы - Саран қаласы ББ әдіскері,  Рустемова Жанар Айдарбекқызы - ҚарМУ, қазақ әдебиеті кафедрасының оқытушысы, доцент, филология ғылымдарының кандидаты, Айткенова Мөлдір Болатовна - «Өрлеу БАҰО» АҚ филиалы Қарағанды облысы бойынша ПҚ БАИ, аға оқытушы, Жаканова Жұпар Рыскуловна - «Қарағанды облысы Тілдерді оқыту орталығы» ЖК, аға әдіскер, Мусина Анар Ермековна - №57 мектеп-лицейінің оқу ісінің меңгерушісі, қазақ тілі мен әдебиеті пән мұғалімі, Жапбаркулова Айнур Турганбековна - №76 ЖББОМ тәрбие ісінің меңгерушісі, қазақ тілі мен әдебиеті пән мұғалімі сияқты білікті де білгір мамандар болды.  Байқау соңында әділқазылар алқасы сынға түскен ұстаздардың еңбегін бағалап, тиісті орындар тағайындап, түрлі номинациялық атаулармен марапаттады. «Жүйріктен жүйрік озар жарысқанда» демекші, өзінің шеберлігін көрсетіп, алға оза шыққан ұстаз №54 ОМ мұғалімі Қасымжанова Зулфия Зарықбайқызы жүлделі І орынды иеленді.