Қарағанды қаласының №2 өнер мектебі-Юнеско клубы негізінде Қарағанды облысының білім басқармасы және Қарағанды қаласының білім бөлімі мамандарының қатысуымен №2 өнер мектебі мен Тәттімбет атындағы Қарағанды өнер колледжі арасында дуалдық оқытуды енгізу бойынша шартқа қол қойылды.  

Аталған шартқа қол қою Елбасы Н.Ә. Назарбаевтың дуалдық оқыту аясында мәдениет және өнер мамандарының сапалы дайындықтарын қамтамасыз ету, қосымша білім беруде дуалдық оқыту жүйесін енгізу мақсатындағы техникалық және кәсіби білім беруді модернизациялау туралы Тапсырмасын орындау үшін ұйымдастырылды. 

Әлемде кеңінен таралған дуалдық оқыту жүйесі теория мен практика арасындағы,  әсіресе педагогикалық жұмыста үзілуді болдырмаудың тиімді жолдарының бірі болып саналады. 

№2 өнер мектебі-Юнеско клубы Тәттімбет атындағы колледж студенттерінің кәсіби педагогикалық практикаларын өтудің тиімді базасы болмақ. Мектепте тәжірибелі шығармашылық ізденістегі педагогтар жұмыс атқарады және олар республикамыздың өнер мектептері үшін хореография, театрлық, музыкалық-театрлық, бейнелеу, эстрада-цирк өнерлері бойынша жаңа ұрпақтың оқыту бағдарламаларын әзірлейді.  

Мектеп болашақ мәдениет мамандарымен табысты жұмыс жасау үшін үлкен әлеуетке ие. Колледж студенттерін оқыту, әрине, қосымша білім берудің жаңа форматында білікті жас педагогтарды қалыптастыруға ықпал етеді.