№2 өнер мектебі-Юнеско клубы негізінде 2014 жылғы 10-20 қараша аралығында республикамыздың барлық аймақтарынан келген мектептен тыс ұйымдардың педагогтарына арналған «Қосымша білім берудің музыкалық бағытында (домбыра, қобыз) балалардың әлеуметтік-жеке тұлға дамуын ұйымдастыруға заманауи жолдар» атты Республикалық біліктілікті арттыру курстары өткізілді.

Курстар қосымша білім беру ұйымдары педагог-музыканттарының музыкалық бағытындағы өзекті тақырыптар және инновациялық технологиялар бойынша кәсіби білімдерін кеңейту, өзін-өзі оқытудың мазмұнын анықтауға ықпал жасау, сонымен қатар өзіндік педагогикалық тәжірибені сараптау және оны жетілдіру мақсатында ұйымдастырылды.

Курстардың оқу бағдарламасы 4 негізгі модульдерден құрылды, олар нормативті модуль, психологиялық-педагогикалық модуль, теориялық-технологиялық модуль, тәжірибелік-бағдарланған модуль.

Курстар өткізудің негізгі формалары ретінде дәрістер, семинарлар, практикумдар, мастер-кластар және әртүрлі тренингтер пайдаланды. Курстардың дәріс оқушылары С.С. Қонтаев, Қарағанды облысы білім Басқармасының Оқу-әдістемелік орталығының ғылыми жетекшісі; А.Е. Тоқтағанов, Қазақ Ұлттық өнер университетінің профессоры; А.С. Абдрахманова А.С., біліктілікті арттыру Ұлттық орталығы Қарағанды филиалының оқытушысы; Тәттімбет атындағы Қарағанды өнер колледжінің оқытушылары Г.К. Абишева, Б. Ж. Абжаппарова, Ж.Ы. Жумабеков және басқалары болды.

Курстар барысында курстарға қатысушылардың арасында нәтижелі тәжірибе алмасу жүргізіліп, бір қатар маңызды мәселелер мен жұмыс бағыттары талқыланды.