Қараша айында орыс тілді мектептердегі қазақ тілі мен әдебиеті мұғалімдері түрлі іс-шаралардың куәгері болды. Ай биыл аттестаттауға өтініш берген мұғалімдердің біліктілік тестін тапсыруымен басталды. Жалпы 107 мұғалім аттестаттауға өтініш берген болса, оның 80 %-ы алғашқы айналымда-ақ тест сұрақтарының қажетті мөлшеріне жауап беріп, екінші кезеңге өтті. Қалған 20%-ына желтоқсан соңында (20-21 желтоқсан күндері) тесті қайта тапсыруға мүмкіндік беріледі. Әріптестерімізге сәттілік тілейміз!

Қарашаның 12-сі күні № 81 мектеп ғимаратында қаламыздың мектепішілік әдістемелік бірлестіктері арасында «Ең үздік ӘБ» көрмесі өткізілді. Көрмеге қатысқан 19 бірлестік арасында бекітілген ережеге сай шығармашыл ӘБ, белсенді ӘБ, жаңашыл ӘБ, жас мамандармен жұмысы озат ӘБ (немесе жақсы тәлімгер ӘБ), құжат рәсімдеуде үздік ӘБ, тәжірибелі ӘБ жетекшісі, тұрақты ӘБ жетекшісі, мектептің ӘБ белсенді мүшесі сияқты бағытқа сай бірлестіктер анықталуы қажет болатын. Іріктеу кезеңінен тек 9 бірлестіктің құжаты сытылып шықты. Олар: № 3, 9, 38, 93, 97 гимназиялар, № 101 лицей, № 25, 33, 77 мектептер. Байқаудың жеңімпаздары Қарағанды қаласының білім бөлімінің дипломдарымен (Қазақ тілі мен әдебиеті мұғалімдерінің үздік әдістемелік бірлестігі көрмесінің ережесіне сәйкес) марапатталды:
№ 38 гимназияның ӘБ – «Құжат рәсімдеуде үздік, шығармашыл ӘБ» номинациясы бойынша
№ 97 гимназия ӘБ –  «Белсенді ӘБ» номинациясы бойынша -;
№ 93 гимназия ӘБ – «Жаңашыл, кәсіби шеберлігі жоғары ӘБ» номинациясы бойынша
№ 101 мектеп лицейі ӘБ жетекшісі Сатбекова Күләш Мұхаметбековна – «Тәжірибелі ӘБ жетекшісі» номинациясы бойынша
№ 33 ОМ ӘБ жетекшісі Сатыбалдина Дина Кабаевна – «Тұрақты ӘБ жетекшісі» номинациясы бойынша
«Мектептің ӘБ белсенді мүшесі» номинациясы бойынша № 25 ОМ мұғалімі Сәметова Бибігүл Зұфаровна
Көрмеге қатысып, номинацияға ілікпеген мектептердің ӘБ
№ 3, 9 гимназия, № 54, 78, 77, 13, 66, 81, 17, 82, 64, 44, 74 ОМ  қатысушы сертификаттарымен марапатталды.
Қатысушыларға, ұйымдастырушыларға алғысымызды білдіріп, жеңімпаздарды құттықтаймыз!!!

Араға 1 апта салмай қаламызда Республикалық семинар болып өтті. Семинарға қаламыздың 2 мектебінен 1 мұғалімнен пленарлық отырысқа, 14 мұғалім ОБСЕ өкілі өткізген тренингке қатысты. Пленарлық отырыста Министрлік өкілі Роза Мұхаметжановна Батталдың, Абай атындағы ұлттық университеттің профессоры Ф.Оразгулованың, «Шың» кітабының авторы Қ.Ибрагимовтың, Жыл мұғалімі атағына ие болған атақты мұғалімдердің баяндамалары тыңдалып, ойлары ортаға салынды. Семинардың кең көлемі, ондағы айтылған ойлардың заманауилығы, сөйлеген баяндамашылардың өткір сөзі мен тартымды жаңалықтары қатысушыларды үйіріп, № 38 гимназияның берген сабақтары мен ортаға салған іс-тәжірибесі Республиканың түкпір-түкпірінен келген мұғалімдерді таң қалдырды.

Қараша айының жұмысы № 16 мектептегі семинармен жалғасты. Семинарда қазақ әдебиетінен 2  мен  қазақ тілінен 3 сабақ көрсетіліп, мектепішілік деңгейдегі «Жарқын болашақ» байқауы өткізілді. Қатысушы 36 мұғалім бір ауыздан семинардың пайдасын, сәттілігін атап кетті. Сыныптан тыс іс-шарада кездескен кемшіліктерді талдап, атап кету болашақта қалалық, облыстық деңгейде өтетін іс-шараларда олардың алдын алу үшін өз септігін тигізеді деп сенеміз. Олар – сахнада өзін-өзі алып жүруі (көрерменге теріс қарап тұру, әрекеттің оқылған өлеңге немесе шығармаға сәйкес келмеуі), дауыс ырғағының төмендігі, киілген киімнің олқылығы сияқты кемшіліктер.

Семинарды ұйымдастырып өткізген № 16 мектеп ұжымына, қазақ тілі мұғалімдеріне, әкімшілігіне білім бөлімі әдіскерінің алғысы мол!