Құрметті ұстаздар!
Қадірлі білім беру саласының ардагерлері!

    Егеменді еліміздің болашағы – жас ұрпаққа білім мен тәрбие беретін ұстаздар қауымының ерен еңбегі мен қажымас қайратының нәтижесінде бүгінде өрелі өрендеріміз өздерінің қарым-қабілетін жақсы қырынан танытып, түрлі деңгейде өткізіліп келе жатқан пәндік байқаулар мен олимпиадаларда қазақстандық білім беру жүйесінің жетістігін дәлелдеп келеді

Елбасы Нұрсұлтан Назарбаев кезекті Қазақстан халқына жолдауында: «Елді жаңғырту стратегиясын іске асырудың табыстылығы, ең алдымен, қазақстандықтардың біліміне, әлеуметтік және дене болмысы, көңіл-күйлеріне байланысты», - дей келе, келешек ұрпақты жаңаша тәрбиелеу, замана талабына сай білім беру мәселелеріне жан-жақты көңіл бөлген болатын.

Бұл салада Елбасы тапсырмасын жергілікті жерлерде өміршең етуге байланысты кешенді шаралар қолға алынып жүзеге асырылуда. Қазыналы қаламызда орта оқу ордаларына күрделі жөндеу жұмыстары жүргізіліп, жаңадан мектепке дейінгі мекемелер салынып, пайдалануға берілуде. Білім ордаларының материалдық-техникалық базасы нығайтылып, сыныптарды замана талабына сай жабдықтауға қалалық бюджет есебінен қыруар қаржы бөлінуде.
Атап айтқанда, биылғы жылы білім саласын қаржыландыруға жергілікті қазына кірісінің 56 пайызы жұмсалып отыр.

Осындай игілікті жұмыстардың барлығы – еліміздің  келешегі жастардың алаңсыз білім алып, бойларындағы қарым-қабілеттерін жарқырата таныта білулеріне жан-жақты жағдай туғызу мақсатында жүзеге асырылып отырған шара екені белгілі.

  Ортақ істің оңтайлы шешілуіне білім беру саласы мамандарының қосып отырған үлесі ерекше.    

Ертеңгі күні мемлекетіміздің атақ-даңқын асқақтар білікті ұрпақ тәрбиелеп, зияткерлік әлеуетінің өсе түсуі, олардың өзгелерден оқ бойы озық тұруы – Сіздердің қажырлы еңбектеріңізге тікелей байланысты.

Сіздерді кәсіби мерекелеріңіз – Ұстаздар күнімен шын жүректен құттықтай отырып, тәуелсіз Қазақстанның өсіп-өркендеуі мен дамуына және ұлағатты ұландарды тәрбиелеу саласында зор табыстарға жете берулеріңізге тілектеспіз.

Денсаулықтарыңыз мықты болсын, мол бақыт, жанұяларыңызға  ырыс-береке және шаттық тілейміз!

 Қарағанды қаласының әкімі Б. Әбдішев
 Қарағанды қалалық мәслихатының хатшысы Қ. Бексұлтанов