Желтоқсан айының бірінші жартысы орыс мектептеріндегі қазақ тілі мен әдебиеті пәнінің мұғалімдері үшін түрлі шараларға толы болды. Семинарлар қатарын № 25 ОМ шаңырағында өткен «Қазақ тілі мен әдебиеті сабақтарында оқушы сауаттылығын дамыту жолдары мен тәсілдері" тақырыбындағы жас мамандар мектебі бастады. Семинар мақсаты – еңбек жолын жаңа бастаған мамандарға сауаттылық түрлері мен оны дамыту жолдарын ашып беру. Қатысушылар 3 сабаққа қатысып, 2 баяндама тыңдады, дөңгелек үстелге қатысты. «Сауаттылық деген не? Оның қандай түрлері бар?» деген сұрақтарға жауап беру арқылы мұғалімдердің біліміндегі олқылықтар анықталып, баяндама тыңдау, тапсырмалар орындау арқылы тәжірибелері толықтырылды. 2, 6, 7 сыныптарда  өткізілген ашық сабақтар осы тақырыптың ашылуына жағдай туғызып, семинардың мақсатына жетуіне ықпал етті.
«Ұстаз бен шәкірттің бірігіп жұмыс жүргізуі арқылы жеке тұлға қалыптастыру» тақырыбындағы келесі семинарды № 9 гимназияның мұғалімдері дайындап өткізді. Әдіскердің қолдауымен құрылған семинар жоспарында 1 баяндама мен 6 сабақ көрініс тапты. Өткізілген сабақтар да, оқылған баяндама да, Тәуелсіздік күні мерекесіне арналған концерттік бағдарлама да семинар тақырыбын ашуға оң ықпал етті.
Айдың бірінші жартысын «Тіл – халық жанын танудың кілті» атты байқау қорытындылады. Тәуелсіздік күні қарсаңында мерекеге бағышталған байқауға қала мектептерінен 20 бала қатысып, Қазақстан, қазақ тілі, қазақ әдебиеті туралы білімдерін ортаға салып, шығармашылық тапсырмалар орындап сайысты. Байқаудың бірінші кезеңінде тестік тапсырмалар орындалды. Тест сұрақтары Қарағанды тарихын,  қазақ тілі мен қазақ әдебиеті пәндерін қамтыды. Екінші кезеңде қатысушылар өздерін таныстырып, өнерлерін ортаға салды. Мың құбылып билеген, құбылтып ән салған, мәнерлеп өлең оқыған 14-18 жас аралығындағы конкурсанттар қазылар алқасы мен көрермендердің көңілінен шықты. Байқаудың қорытындысы қаңтар айында шығарылатыны айтылып, қатысушылар мен оларды дайындаған ұстаздарына ауызша алғыс жарияланды.