2013-2014 оқу жылының қазан айында қаланың орыс тілді сыныптарында қазақ тілінен сабақ беретін мұғалімдерінің әдістемелік бірлестігі қалалық білім бөлімінің жоспарына сай 3 семинар өткізді. Оның бірі 2013 жылғы қазан айының 9 күні, № 35 мектеп қабырғасында «Қазақ тілін оқытуда оқушылардың функционалдық сауаттылығын сын тұрғысынан ойлау арқылы арттыру» тақырыбында өтіп, өз жұмысы барысында қатысушыларға 3 ашық сабақ пен 1 сыныптан тыс ісшара көрсетті. «Қазақстан қалалары» тақырыбында 10 сыныпта өткен география пәнімен кіріктірілген сабақ оқушылардың қызығушылығын арттырып, екі тілді қолдану деңгейлері мен Қазақстан географиясынан білімдерін көрсетті. Бұл сабақ екі пәнді кіріктірудің тиімділігін дәлелдеді.

Сонымен қатар, 6 сыныпта «Алтын сақа» ертегісі, 8 сыныпта «С.Сейфуллиннің «Аққудың айырылуы» поэмасына кіріспе» тақырыптарындағы қазақ әдебиеті сабақтары болып өтті.

Мектеп директоры, әрі қазақ тілі мұғалімі З.Ө.Ағзамова өзінің 9 сыныпқа арналған оқулығымен жұмыс жүргізу жолдарын көрсету мақсатында өз іс тәжірибесін тренинг түрінде ортаға салды.

Семинар жұмысына қатысқан мұғалімдер мектеп оқушыларының өнерлерімен де танысып, ұйымдастырушыларға өз алғыстарын жаудырды.

Семинар өз мақсатына жетіп, оқушылардың функционалдық сауаттылықтарын арттыру жолдарын көрсетіп берді.