«Қарағанды қаласының білім бөлімі» ММ әдістемелік кабинетінің жоспарына сәйкес  «№92 гимназия» КММ базасында ұлт рухын асқақтатқан поэзияның дауылпаз ақыны Қасым Аманжоловтың шығармашылығын оқушылар арасында кеңінен насихаттау арқылы жас ұрпақты патриоттық рухта тәрбиелеу, өскелең ұрпақ бойында Отанға, халқына, жерлес ақынымыз Қасым мұраларына деген мақтаныш сезімдерін қалыптастыру мақсатында «Жасын ғұмыр – Қасым ғұмыр» атты IҮ қалалық Қасым оқулары өткізілді.
Байқау оқыту қазақ тіліндегі 5-10 сынып оқушылары арасында төрт бағытта өткізілді. Байқауда оқушылар Қасым шығармаларын жатқа оқу, жас дарындар берілген тақырып бойынша өлең шығару, ақынның туған жері, Қарағанды өлкесі туралы бейнежоба қорғау және эссе жазу бойынша сайысты. Байқауда 110-нан артық үміткерлер бақ сынасты.
Қазылар алқасы қатысушылардың шығармашылық қасиеттерін, стилистикалық әртүрлілікті және тақырыптың ашылу деңгейін бағалады. Жүлдегерлер арнайы дипломдармен марапатталды.
Дәстүрлі Қасым оқуларының сыйлы қонақтары Қазақстанның еңбек сіңірген қайраткері, ақын Серік Ақсұңқарұлы, республикалық «Қасым» әдеби-қоғамдық журналының бас редакторы, ақын, жазушы Серік Сағынтай, «Дауыс» жыр жинағының авторы, ақын Қайрат Асқаровтар болды. Қонақтар ақын шығармашылығын дәріптеудегі білім бөлімінің және гимназия мұғалімдерінің еңбектерін бағалай отырып, өздерінің жылы лебіздерін білдірді.