Семинар-практикум. «Рухани жаңғыру және жыраулар поэзиясы»

 Қарағанды қаласы білім бөлімі әдістемелік кабинетінің жылдық жоспарына сәйкес 2019ж.18 желтоқсан  №36 жалпы білім беретін орта мектеп базасында Т1. қазақ тілі мен әдебиеті пәні мұғалімдеріне арналған «Рухани жаңғыру және жыраулар поэзиясы» тақырыбында қалалық семинар – практикум болып, өтті.
Семинар мақсаты: Тұлғаны руханилыққа тәрбиелеудегі жыраулар поэзиясының маңызы.
Семинарға қала мектептерінің 50-ге жуық қазақ тілі мен әдебиеті пәні мұғалімдері қатысты. Білім бөлімінің әдіскері Г.Б. Жаркеева семинардың мақсатымен, бағдарламасымен таныстыра келіп, «Жыраулар поэзиясы-рухани адамгершілік тәрбие бастауы» тақырыбында шағын баяндама жасады. Семинарға қатысушылар аталмыш мектептің жоғарғы санатты мұғалімі Д.Н.Заркеева өткізген «Ұлы даланың ұлы тұлғасы» танымдық сабағына және жоғарғы санатты мұғалім Г.М. Қасым ұйымдастырған «Жыраулар поэзиясындағы болжам өлеңдер мен болжал өлеңдер» атты шеберлік сыныбына қатысып, тәжірибе алмасты.
Сонымен қатар, бағдарлама бойынша мектептің «Өлкетану» мұражайына саяхат жасалып, мектеп тәжірибесіндегі Өлкетану жұмыстарының жүргізілуі таныстырылды. Тәжірибелі ұстаздар А.А.Қуанбаева мен А.А. Кептербаева  «Жыраулар поэзиясын оқытудағы тиімді әдіс-тәсілдер» атты коучингте семинарда көтерілген мәселелерді қатысушылармен бірлесе талқылап, жыраулар поэзиясын оқытудағы жаңаша, тың әдіс-тәсілдер ұсынып, тәжірибелерімен бөлісті,  қатысушылар топтық жұмыс барысында өз көзқарастарын дәлелдеді.
Семинар соңында әдіскер Г.Б. Жаркеева қатысушылармен семинар-практикум барысында жүргізілген жұмыстарға кері байланыс жасады, ұсыныстарын тыңдап, көтерілген мәселелерді талқылады. Семинарға қатысушылар  өткізген жұмыстардың тиімді, шынайы болғандығын, алдағы уақытта өз тәжірибелерінде қолданатынын айтып, мектеп ұжымына шығармашылық табыс тілеп, алғыс білдірді.