ЖММ: Жас мамандарға арналған семинар-практикум
Қалалық білім бөлімі ӘК жылдық жоспарына сәйкес  №102 мектеп-гимназияның базасында жас мамандарға арналған «Функционалды сауаттылық индикаторлары» атты қалалық семинар болып өтті. Семинарға қала мектептеріненен 30  жас маман қатысты. Семинардың ашылуында гуманитарлық пәндер кафедрасының жетекшісі Д.О.Амантаева семинарға қатысушыларға мектеп туралы қысқаша мәлімет беріп, сәттілік тіледі. Қалалық білім бөлімінің әдіскері Жаркеева Гүлназ Бекетовна «Ұлттық жоспар: функционалды сауаттылық» тақырыбында баяндама жасап, жас мамандарға, семинарда ықшам сабақ, коучинг өткізетін мектеп-гимназияның  қазақ тілі мен әдебиеті пәндерінің мұғалімдеріне сәттілік тіледі.
Семинар барысында бағдарлама бойынша қазақ тілі мен әдебиеті пәндерінің мұғалімдері Н.А.Акмамбетова, Т.А. Аскарбаева, Б.З.Оразгалиева, Ж.Т.Жунусова  жас мамандармен ықшам сабақтар өткізді. Ықшам сабаққа жас мамандармен бірге 4 тәжірибелі ұстаз  қатысты. Ықшам сабақтарда мұғалімдер оқушылардың оқу сауаттылығын дамытудың түрлі интербелсенді әдіс-тәсілдерін көрсетті. Олар: скрайбинг әдісі, Фрайер әдісі, Джованидің құпиясы, графикалық органайзер, «6 неліктен», ресторан әдісі.
Қорытындылау кезінде тәжірибелі ұстаздар өздерін таныстырып, тәжірибелерімен бөлісті. Сабақ талдау барысында жас мамандарға кеңестерін айтты. Қатысушы жас мамандар тапсырма орындау барысында белсенділік танытып, тапсырманы аса қызығушылықпен орындады. Қазақ тілі мен әдебиеті пәнінің мұғалімі Ж.Т.Жунусова  аукцион түрінде өзінің  сабақта қолданатын Prezi.com презентация жасайтын бағдарламасын ұсынды.
Қазақ тілі, әдебиеті пәндерінің мұғалімдері Ж.А. Муканова мен Д.О.Амантаева «Мәтінмен жұмыс-оқушының функционалды сауаттылығын дамытудың негізгі тәсілі» тақырыбында коучинг өткізді. Коучинг барысында жас мамандар коуч өткізген мұғаліммен бірлесе отырып, мәтін бойынша тапсырмаларды орындады. Жас мамандар функционалды сауаттылыққа  қатысты сұрақтар қойып, өздеріне көп мәлімет ала алды. Мектеп психологі Ш.Ж.Кадырова «Жарқын болашақ иесі-бүгінгі жас маман» айдарымен психологиялық тренинг жүргізді.
 Семинар қатысушылардың қызығушылығын қанағаттандыратындай интербелсенді режімде өтті.