2019 жылғы  24  сәуірде  «№61 ЖББОМ» КММ базасында қалалық білім бөлімінің жоспарына сәйкес қазақ мектептеріндегі 5-10-сынып оқушылары арасында ХХ  республикалық Абай оқуларының қалалық кезеңі  өткізілді.
Өткен жылы ХІХ республикалық Абай оқуларына қатысып, қалалық, облыстық кезеңдерінен жүлделі орын алған Скакова Нұргүл республикалық кезеңге жолдама алып, Қарағанды облысының атынан қатысып, Семей қаласында өткізілген сайыста бас жүлдеге ие болған еді, республика жеңімпазы байқауда мәнерлеп өлең оқу шеберлігімен шараның ашылу сәтінде көпшілікті тағы бір рет өнерімен тәнті етті. Мектеп  басшысы Галимуллина Райхана Муллагалиевна Абай оқуларына қатысушыларға сайыста жеңіске жетулеріне  ақ жол тіледі. Байқауда қала мектептерінен барлығы 120 бала бақ сынасты. 
  Қалалық білім бөлімінің әдіскері Гүлназ Бекетқызы XХ республикалық Абай оқуларының мақсатымен, бағыттарымен таныстырып өтті. Байқаудың мақсаты: «Болашаққа бағдар: рухани жаңғыру» бағдарламасын жүзеге асыру және мектеп оқушылары арасында Абай, Шәкәрім шығармаларын насихаттау, ұлылар поэзиясына, рухани мұрасына деген сүйіспеншілікке тәрбиелеу.
Абай оқулары дәстүрлі түрде төрт бағыт бойынша өткізілді:
- «Өлең – сөздің патшасы, сөз сарасы» - Абай мен Шәкәрім шығармаларын жатқа оқу. 
- «Көңілім әнді ұғады» - Абай мен Шәкәрімнің әндері мен күйлерін орындау.
- «Жүйріктен жүйрік озар жарысқанда» - жас дарындар конкурсы (өз шығармаларын орындау: өлеңдер, әндер, күйлер).
- «Ұлылар әлемі» Абай және Шәкәрім еңбектеріне эссе жазу.
      ХХ республикалық Абай оқуларының қалалық кезеңіне қатысушыларды білікті қазылар алқасы сараптады. Қазылар алқасының төрағасы: ҚарМУ филология факультеті, қазақ тілі кафедрасының доценті- Қалиев Бектұрсын Аманқұлұлы болса, Әділқазылар алқасының мүшелері құрамында Қарағанды облысы жастар ресурстық орталығының маманы, ақын, халықаралық «Шабыт» фестивалінің лауреаты Асқаров Қайрат Белгібайұлы, Н.В.Гоголь атындағы Қарағанды облыстық әмбебап ғылыми кітапханасының абонемент бөлімінің жаңа қызмет түрлері секторының басшысы Ахмадиева Алмагүл Сәдуақасқызы; мамандандырылған музыка мектеп-интернаты, домбыра-тенор мұғалімі Шаяхметов Медет Максутович және №36 ЖББОМ қазақ тілі мен әдебиеті пәнінің мұғалімі Кептербаева Айгүл Сағынтаевналар еніп, төрелік етті.
Байқау нәтижесі:
1. «Өлең сөздің патшасы – сөз сарасы» номинациясы бойынша
Бас жүлде - №61 ЖББОМ 9-сынып оқушысы Мұрат Ділназ;
2. «Көңілім әнді ұғады» номинациясы бойынша
І орын - №65 ЖББОМ 5-сынып оқушысы Жиенбаев Алтынбек;
3. «Жүйріктен жүйрік озар жарысқанда» номинациясы бойынша
І орын - №41 МГ 9-сынып оқушысы Наурызбай Аятолла;
4. «Ұлылар әлемі» номинациясы бойынша
І орын - №57 МЛ 10-сынып оқушысы Шубаева Айгерім.
Жеңімпаздар қалалық білім бөлімінің дипломдарымен марапатталып, төстеріне арнайы төсбелгілер тақса, бас жүлдегер мен І орын алған оқушыларға республикалық байқауға жеңімпаз дайындаған аталмыш мектептің қазақ тілі мен әдебиеті пәні мұғалімі Торекелдина Дидар Қарсыбекқызы өз тарапынан Абайдың екі томдық жинағын тарту етті.
Шара соңында әдіскер Г.Б. Жаркеева байқауда төрелік еткен қазыларға шығармашылық қолдау көрсеткендері үшін білім бөлімінің атынан алғыс хат  пен Абайдың өлеңдер жинағын табыс етті. Сонымен қатар, шараны жоғары деңгейде ұйымдастырып, шығармашылық танытқан Д.Қ.Торекелдинаға, мектеп ұжымына, мектеп басшысы Галимуллина Райхана Муллагаливнаға алғыс білдірді.