Қазан айының 14-і күні Қалалық білім бөлімінің Әдістемелік кабинеті жоспарына сәйкес № 65 орта мектеп қабырғасында орыс мектептерінде жұмыс істейтін қазақ тілі мұғалімдерінің қалалық семинары болып өтті. Семинарға қала мектептерінен 46 ұстаз жиналып, 65-ші мектеп ұжымының дайындаған баяндамасын тыңдап, ашық сабақтарына қатысты.
Аталмыш мектепте 2 жыл ұстаздық еткен жас маманның «Сабақ түрлері мен құрылымы» тақырыбындағы баяндамасы қатысушылардың ойынан шығып, сабақ түрлері мен оларға дайындық кезеңдері туралы көптеген жаңа мәліметтер берді. Баяндама мұғалімнің көп ізденгенін, мектеп әдістемелік бірлестігі мүшелерінің ұйымшылдықпен әрекет жасайтынын көрсетті.
Семинар барысында сонымен қатар 4 ашық сабақ жоспарланып, өткізілді. Олар:

1. 6 сыныпта «Алтын күз» тақырыбындағы дәстүрлі сабақ. Мұғалімі – Тәңірбергенова К.Н.
2. 9 сыныпта «Достық» тақырыбындағы сайыс сабақ. Мұғалімі – Бәкірова А.Д.
3. 10 сыныпта «Тарихи таным» тақырыбындағы саяхат сабақ. Мұғалімі – Түкбаева Л.Е.
4. 11 сыныпта «Бұл әлемде қызық көп» тақырыбындағы интеллектуалды ойын сабағы. Мұғалімі – Қаймолдина Г.Қ.

Сабақтардың барлығы әдістемелік жағынан сауатты ойластырылған, жоспарларын құру барысында мұғалімдер мен оқушылардың жетістіктерін көрсету мәселесі ескерілген. Дәстүрлі емес сабақтардың барлығы интерактивті тақта көмегімен, түрлі әсерлерді қолдана отырып, флипчарттар құру арқылы өткізілді. Сабақтар мектеп мұғалімдерінің қазіргі заманға сай техникаларды жүйелі түрде қолданатынын, оқушылардың тақтаны қолдану тәжірибесінің жоғары деңгейін көрсетті.
Жалпы, семинарды, мектеп ұстаздарының әрекетін қатысушылар жоғары бағалап, алғыстарын жаудырды. Сабақтарды талдау барысында осы оқу жылының басында өткен семинарлардың ұстаздар әрекетіне әсерін тигізгені байқалды: мұғалімдер сабақ талдау барысында 30 қыркүйекте берілген «Сабақ талдауға қойылатын жалпы талаптар» баяндамасы мен ұсыныстарды ескерді.
Семинарға жауапты дайындалған № 65 орта мектеп ұжымына, қазақ тілі мен әдебиеті мұғалімдерінің әдістемелік бірлестігіне, қатысқан қала мектептерінің мұғалімдеріне алғысымды білдіремін.
Келесі семинар-тренинг қазан айының 28-і күні № 87 мектепте ӘБ жетекшілері үшін «Мектептің әдістемелік бірлестігінің құжаттары мен іс-әрекетіне қойылатын талаптар» тақырыбында өткізілетінін ескертемін.

ФОТО