Қарағанды қаласы білім бөлімі әдістемелік кабинетінің жоспарына сәйкес 30 қаңтар күні «№1 гимназия» КММ базасында ағылшын пәні мұғалімдерінің «Жаңашыл сабақты ұйымдастыру» тақырыбындағы практикалық семинары өткізілді.

Дәстүр бойынша алғашқы сөз гимназия директоры Рябова И. Н. берілді. Одан кейін директордың орынбасары Лытнева Е.Г. қонақтарды гимназияның жұмыс жоспарымен таныстырды.

Практикалық бөлімде гимназияның 4 мұғалімі ашық сабақтар өткізді:

 Гусева Н.В. 1-сыныпта шет тілін үйренудің бастапқы кезеңінде аудиовизуалды әдіс арқылы «This is the way» тақырыбы бойынша сабақ өткізді. Колябина Г.М. сабақтың әр кезеңінде қалыптастырушы бағалауды қолдана отырып «My favorite dish» тақырыбында сабақ берді. Шибаева И.В. «My favorite food» тақырыбы бойынша өткізген сабағында оқушылар арасында сыни ойлау мен қарым-қатынас дағдыларын дамытатын Сингапур әдістемесі технологияларының элементтерін көрсетті. Блощицына-Лепявко А.М.оқушылардың білім беру және аналитикалық дағдыларын дамытуға бағытталған тапсырмаларды қолдану арқылы «Project work Books in our life» тақырыбы бойынша 7-сыныпта сабақ өткізді.

Семинардың екінші кезеңінде «Дөңгелек үстел» ұйымдастырылды. Мұғалімдер қатысқан сабақтары бойынша талдау жасап, ойларын ортаға салып, тілектері мен ұсыныстарын білдірді.

Келесі кезекте әдіскер С.К.Абеуова биылғы оқу жылындағы қалалық олимпиадаға талдау жасап өтті. Сонымен қатар, ХХІ ғылыми-практикалық конференцияға дайындауға арналған ұсыныстарымен бөлісті.