III қалалық Қасым оқулары «Жасын ғұмыр – Қасым ғұмыр»

«Қарағанды қаласының білім бөлімі» ММ әдістемелік кабинетінің жоспарына сәйкес  25 қаңтар күні «№92 гимназия» КММ базасында ұлт рухын асқақтатқан поэзияның дауылпаз ақыны Қасым Аманжоловтың шығармашылығын оқушылар арасында кеңінен насихаттау арқылы жас ұрпақты патриоттық рухта тәрбиелеу, өскелең ұрпақ бойында Отанға, халқына, жерлес ақынымыз Қасым мұраларына деген мақтаныш сезімдерін қалыптастыру мақсатында «Жасын ғұмыр – Қасым ғұмыр» атты III қалалық Қасым оқулары өткізілді.
Байқау оқыту қазақ тіліндегі 5-11 сынып оқушылары арасында бес бағытта өткізілді. Байқауда оқушылар Қасым шығармаларын жатқа оқу, Қасым өлеңдеріне шығарылған әндерді орындау, жас дарындар берілген тақырып бойынша өлең шығару, ақынның туған жері, Қарағанды өлкесі туралы бейнежоба қорғау және эссе жазу бойынша сайысты. Байқауда 140-қа жуық үміткерлер бақ сынасты.
Қазылар алқасы қатысушылардың шығармашылық қасиеттерін, стилистикалық әртүрлілікті және тақырыптың ашылу деңгейін бағалады. Жүлдегерлер арнайы дипломдармен марапатталды.
Қарағанды қаласының 85 жылдық мерейтойымен тұспа-тұс келген қалалық Қасым оқулары қарсаңында гимназияда «Қасымтану»  кабинеті ашылды. Кабинет ақын өмірі мен шығармашылығынан жан – жақты сыр шертеді. Осы салтанатты сәттің куәгері Қазақстанның еңбек сіңірген қайраткері, ақын Серік Ақсұңқарұлы, айтыскер ақын, филология ғылымдарының докторы, профессор Қойлыбай Асанов, республикалық «Қасым» әдеби-қоғамдық журналының бас редакторы, ақын, жазушы Серік Сағынтай, «Дауыс» жыр жинағының авторы, ақын Қайрат Асқаров, Қасым атындағы республикалық жыр мүшәйрасының жеңімпазы, жас ақын Жәнібек Әлиман, Гоголь атындағы кітапхананың «Жыр – жауһар» клубы жетекшісі, ақын Жоламан Әйткен және қалалық білім бөлімінің әдіскері Жаркеева Гулназ Бекетовна ақын шығармашылығын дәріптеудегі гимназия еңбектерін бағалай отырып, өздерінің жылы лебіздерін білдірді.
Қасымның сыршыл поэзиясы – халқымыз үшін қастерлі, құнды мәдениет қазынасының бірі. Ұрпақтар ақынның әдебиетімізге қосқан үлесін бағалап, мәңгі есте сақтары сөзсіз.